Sabi nga, mahihiya na raw ang "Netflix" sa mga nagaganap na episodes sa Senado, na halos araw-araw, may iba't ibang plot twists tuwing may plenaryo.
Biro pa ng mga netizen, dinaig pa nga raw ng mga teleserye at pelikula ang panonood ng plenary sessions sa Senado: may drama na, may action, may comedy, may romance, at iba pang mga genre ng panoorin, na paminsan pa nga, sabay-sabay na nagaganap habang pinapanood ang bawat kilos at pahayag ng 24 na senador ng Republika ng Pilipinas.
Huli nga bago mag-adjourn ang sesyon hanggang 5:00 PM ng Hunyo 1, ay ang mainit na debate sa pagitan ng ilang mga senador sa majority at minority bloc, na humantong pa nga sa pag-walk out ng "SB 11" o Solid Block 11 ng minorya.
Maki-Balita: 'Bakit kailangang madaliin?' Senate minority bloc, nagpaliwanag bakit nag-walk out!
Nagkaroon kasi ng mosyon mula sa majority bloc na baguhin ang ilang panuntunan sa Senado patungkol sa pagdalo ng mga senador sa sesyon sa pamamagitan ng remote set-up, o paggamit ng teleconference o videoconference, bagay na pinalagan naman ng minorya.
Red flags na paraan ng paghingi ng 'sorry'
Nagkapalitan pa ng mainit na debate sa pagitan nina Sen. Rodante Marcoleta at Sen. Risa Hontiveros tungkol sa legalidad ng pagpapalit ng rule na ito: na kailangan, physically present ang mga senador sa sesyon, at kaya lang pinayagan noon ang remote set-up ay dahil sa panahon ng pandemya.
Nang subukin ni Senate President Alan Peter Cayetano, na noon ay hindi nagpe-preside at nagsusulong ng mga motion, na i-divide na lang ang house para magbotohan, dito na umalma ang mga senador ng minority bloc at napagpasyahang mag-walk out.
Ang tanging natira lamang sa sesyon ay ang napatalsik na dating senate president at kasalukuyang minority leader na si Sotto.
Kasunod ng walkout, naging sentro ng usapan ng mga natitirang senador sa majority bloc kung maaari pa bang ituloy ang sesyon at ang deliberasyon hinggil sa kontrobersiyal na rule change.
Iginiit naman ni Sotto na i-adjourn ang sesyon o magkaroon ng quorum call.
“I move to adjourn or a quorum call… That is a higher precedence,” saad ni Sotto.
'I only see the minority leader representing the minority. The others had left," saad ni Senate President Pro Tempore Loren Legarda na siyang presiding officer nang mga sandaling iyon.
Ngunit kinuwestyon ito ni Marcoleta kaugnay kung nawawala ba ang quorum kahit nag-walk out ang minority senators.
“Kapag ba nag-walk out ang minority nawawala ’yong quorum? Nagsimula tayo may quorum. It doesn't matter if they walked out. I think we still have the quorum,” ani Marcoleta.
'Yes" naman ang sagot ni Legarda tungkol sa pagkakaroon nila ng quorum bago umalis ang minority senators.
Dito na sumagot si Sotto at diretsahang bumanat ng, “The motion to adjourn is not debatable. Akala ko ba magaling sa rules?”
Ipinaliwanag pa ni Sotto na sa oras na magkaroon ng quorum call, kinakailangan munang tiyakin kung sapat pa ang bilang ng mga senador bago magpatuloy ang sesyon.
“Not upon a situation when they readily and willingly walked out. Hindi ’yon covered ng rule natin,” saad naman ni Marcoleta.
Sa huli, inihayag ni Legarda ang pagpapaliban ng sesyon matapos banggitin ang posisyon nina Sotto at ng minority leader.
“As reiterated by the Senate President and as conveyed by the minority leader, former Senate President, the rule states that the motion to adjourn takes precedence. I am not taking sides and we will adjourn session until 5 p.m., Monday, June 1,” anunsyo ni Legarda.
Maki-Balita: ‘Akala ko ba magaling sa rules?’ Sen. Marcoleta, binulaga ni Sen. Sotto tungkol sa ‘quorum’
Dahil dito, hindi na nagkaroon ng usapan patungkol sa nabanggit na usapin.
Ngunit ano nga ba ang kahulugan ng "quorum" kung sa konteksto ng Senado ang pag-uusapan.
Ayon sa diksyunaryo, ang quorum ay pinakamababang bilang ng mga miyembro na kinakailangang dumalo sa isang pagtitipon, pulong, o asembleya upang maging opisyal ang kanilang mga desisyon at transaksyon. Kung kulang ang bilang na ito, walang bisa o hindi maaaring pagtibayin ang anumang pasya ng grupo.
Sa madaling salita, dapat higit sa kalahating bilang ng kabuuang bilang ng mga miyembro.
Huwag nang lumayo, may kabuuang 24 senador ang Senado ng Pilipinas. Upang makapagsagawa ng opisyal na pagpapasya o deliberasyon, kinakailangang may quorum na hindi bababa sa 13 senador na present sa sesyon. Physically present.
Kung ang majority bloc ay may 13 senador, quorum na agad ito, subalit absent si Sen. Bato kaya 12 lamang sila.
At dahil nga nag-walk out ang 11 senador mula sa minority, 12 senador na lamang ang matitira sa session hall — isang bilang na mas mababa sa kinakailangang 13 para magkaroon ng quorum.
Ibig sabihin, wala pa rin sa quorum kaya hindi sila puwedeng magdesisyon tungkol sa usapin.
Ang isyu ay may kinalaman sa Senate procedure at quorum, at hindi lamang simpleng usapin ng majority rule.
Kaya nga malaking usapin din ang umano'y sunod-sunod na paglitaw ng mga kaso laban sa mga senador na nasa majority bloc, kaya ang sabi ng mga taga-minorya, kaya "parang minamadali" ang pagbabago sa scheme ng pagdalo sa sesyon.
Samantala, ipinaliwanag naman ni Sen. Risa Hontiveros na ibang-iba naman daw ito sa naging senaryo noon kay dating senador at ngayon ay Mamamayang Liberal (ML) party-list Rep. Leila De Lima.
Ipinaliwanag ng senador na noong panahon ni De Lima ay kasagsagan ng Covid-19 pandemic kung saan maging ang Senado at iba pang institusyon ay gumagamit ng videoconferencing bilang bahagi ng health protocols.
Dagdag pa niya, malinaw umano sa Senate Rules na pinapayagan lamang ang videoconferencing sa panahon ng force majeure o national emergency.
"Una, COVID pandemic noon at ang Senado, gaya ng ibang institusyon, ay naka video-conferencing. The Senate Rules only allow videoconferencing due to force majeure or occurrence of national emergency. Wala namang pandemic ngayon," paliwanag ng senadora.
Maki-Balita: Sen. Risa kontra sa videoconferencing push ng mayorya, 'wag daw ikumpara kay De Lima
Kaya sa pagbabalik ng sesyon ng Senado sa Hunyo, isa ito sa mga usaping muli na namang tututukan ng sambayanan.
