Sa napakaraming uri ng hayop sa mundo, ang chimpanzee ang kinikilalang pinakamalapit na nabubuhay na kaanak ng tao.
Ayon sa mga ulat, kasama ng malapit nitong kamag-anak na bonobo, nagbabahagi ang chimpanzee at tao ng humigit-kumulang 98.7 hanggang 98.8% ng kanilang DNA, dahilan upang maging mahalagang paksa ito sa pag-aaral ng ebolusyon, pag-uugali, at pag-unlad ng utak ng tao.
Ayon sa American Museum of Natural History, ang mataas na antas ng pagkakatulad sa genetic makeup ng tao at chimpanzee ay nagpapaliwanag kung bakit marami silang katangiang kahawig ng tao.
Kabilang dito ang kakayahang gumamit ng mga simpleng kagamitan, paglutas ng mga problema, pagkatuto mula sa karanasan, at pagpapakita ng iba't ibang emosyon tulad ng saya, lungkot, takot, at pakikiramay.
Matatagpuan ang mga chimpanzee sa mga kagubatan at savanna ng Africa. Kabilang sila sa grupo ng mga great ape, kasama ng gorilya, orangutan, bonobo, at tao. Kilala sila sa kanilang mataas na antas ng katalinuhan at kakayahang makibagay sa kanilang kapaligiran.
ALAMIN: Mga puwedeng gawin kapag may ahas sa loob ng bahay ninyo!
Ayon sa pag-aaral, isa sa mga dahilan kung bakit itinuturing na pinakamalapit na kaanak ng tao ang chimpanzee ay ang pagkakatulad ng kanilang utak. Sa lahat ng hayop, sila ang may pinakakahawig na estruktura at komposisyon ng utak sa tao.
Dahil sa kanilang neural connectivity o koneksiyon ng mga nerve cell sa utak, nakapagpapakita ang mga chimpanzee ng masalimuot na pag-uugali. Nakagagamit sila ng mga kilos, ekspresyon ng mukha, at iba pang anyo ng komunikasyon upang makipag-ugnayan sa kapwa nila chimpanzee. Nakapagpapakita rin sila ng kakayahang magplano, magtulungan, at matuto mula sa pagmamasid.
Ilang pag-aaral din ang nagpakitang kaya nilang gumamit ng mga patpat upang manghuli ng anay, gumamit ng bato bilang pambasag ng mani, at gumawa ng iba't ibang estratehiya upang makakuha ng pagkain.
Bagama't napakalapit ng relasyon ng tao at chimpanzee sa aspeto ng ebolusyon, nananatili pa rin ang malalaking pagkakaiba sa pagitan ng kanilang mga utak.
Una, ang utak ng tao ay halos tatlong beses na mas malaki kaysa sa utak ng chimpanzee. Ang mas malaking sukat na ito ay nagbibigay ng mas mataas na kapasidad para sa komplikadong pag-iisip, pagpaplano, at malikhaing paglikha.
Ayon naman sa mga pananaliksik na nakatala sa National Center for Biotechnology Information (NCBI), ang cerebral cortex ng tao—ang bahagi ng utak na responsable sa memorya, atensyon, kamalayan, at mas mataas na antas ng pag-iisip—ay may doble o higit pang bilang ng mga selula kumpara sa katumbas nitong rehiyon sa utak ng chimpanzee.
Bukod dito, mas masalimuot din ang koneksiyon ng mga temporal at parietal lobes ng tao. Ang mga bahaging ito ng utak ang may malaking papel sa pagbuo ng wika, pag-unawa sa damdamin ng iba, at mas komplikadong pakikipagkapwa.
Dahil dito, nagkaroon ang tao ng kakayahang bumuo ng masalimuot na mga lengguwahe, kultura, at sibilisasyon na hindi matutumbasan ng ibang hayop.
Patuloy na pinag-aaralan ng mga siyentipiko ang chimpanzee upang mas maunawaan kung paano umunlad ang utak at kakayahang pangkaisipan ng tao sa loob ng milyun-milyong taon ng ebolusyon.
Bagama't halos magkapareho ang DNA ng tao at chimpanzee, ipinakikita ng mga pag-aaral na ang maliliit na pagbabago sa estruktura at koneksyon ng utak ang maaaring naging dahilan ng malaking pagkakaiba sa kakayahan ng tao sa pag-iisip, komunikasyon, at paglikha ng mga komplikadong lipunan.
