Kinumpirma ng mga awtoridad sa Norway ang kauna-unahang kaso ng avian influenza o bird flu sa isang polar bear sa Europe matapos matukoy ang H5N5 variant ng virus sa Svalbard region sa Arctic.

Ayon sa Norwegian Veterinary Institute, natagpuan nitong buwan ng Mayo ang isang lalaking polar bear na tinatayang nasa isang taong gulang pa lamang at isang walrus na parehong patay sa nagyeyelong kapuluan na nasa humigit-kumulang 1,000 kilometro mula sa North Pole.

Sa isinagawang pagsusuri, lumabas na positibo sa H5N5 strain ng avian influenza ang mga sample mula sa dalawang hayop.

Sinabi ni Ragnhild Tonnessen—bird flu coordinator ng Veterinary Institute, na nakababahala ang pagdami ng kaso ng virus sa mga mammal sa Europe.

“The results are part of a trend in which highly pathogenic avian influenza viruses are increasingly being detected in mammals in Europe,” ani Tonnessen.

Sey ng NBI: 'Fugitive Senator Dela Rosa will be arrested whether he likes it or not'

Dagdag pa niya, lumalawak na rin umano ang pagkalat ng virus sa iba’t ibang rehiyon kabilang ang Arctic.

“At the same time, in recent years, the virus has spread to new regions, including the Arctic, where it can have consequences for vulnerable populations and ecosystems,” dagdag niya.

Ayon naman sa governor ng Svalbard, ang presensya ng virus sa brain samples ng polar bear at walrus ay nagpapakita na malamang na bird flu ang naging sanhi ng kanilang pagkamatay.

Hindi ito ang unang pagkakataon na naitala ang bird flu sa mga hayop sa Arctic. Noong 2023, isang walrus din sa Svalbard ang namatay dahil sa naturang virus habang isang polar bear sa Alaska ang naiulat ding tinamaan ng sakit sa parehong taon.

Batay sa datos ng World Organisation for Animal Health (WOAH), tinatayang nasa 140 milyong hayop sa halos 70 bansa ang namatay o isinailalim sa culling dahil sa avian influenza mula Enero 2025 hanggang Marso 2026.

Bagama’t mas mababa ito kumpara sa peak outbreak noong 2021 hanggang 2022, sinabi ng mga eksperto na mas lumawak naman ang pagkalat ng virus sa mga non-avian species o mga hayop na hindi ibon, dahilan upang tumaas ang pangamba sa posibleng transmission nito sa tao.

Patuloy namang binabantayan ng mga awtoridad ang sitwasyon sa Arctic dahil sa posibleng epekto nito sa wildlife at ecosystem sa rehiyon.