Tuluyan nang hindi na nasikatan ng araw ang isang lalaki na umano’y sangkot sa ilegal na droga makaraang pagbabarilin at patayin ng isang grupo ng mga lalaki sa loob mismo ng kanyang bahay sa Pateros, kahapon ng madaling araw.

Dahil sa tama ng bala sa leeg at dibdib, dead on the spot si Nelwyn Gardoce y Musni, alyas “Doro”, 37, tricycle driver, ng No. 461 T. Sulit Street, Barangay Aguho, Pateros.

Patuloy namang inaalam ng awtoridad ang pagkakakilanlan ng mga suspek na sakay sa mga motorsiklong walang plaka.

Sa ulat na natanggap ng Southern Police District-Public Information Office (SPD-PIO), dakong 3:30 ng madaling araw nangyari ang pamamaril sa loob ng bahay ng biktima.

Himbing na himbing ang biktima sa kanyang bahay nang biglang siyang pasukin ng mga armadong lalaki at binaril nang malapitan. Kabilang umano sa drug watch list ng Pateros Police si Gardoce. (Bella Gamotea)