Isang ginang ang patay nang pagsasaksakin ng kaniyang kapitbahay bunsod ng awayan umano tungkol sa ilegal na koneskiyon ng kuryente sa Antipolo City nitong Huwebes, Enero 23.
Dead on arrival sa Mambugan Hospital ang biktimang si Susan Legita, 55, helper, at residente ng Siruna Village, Phase 1, Brgy. Mambugan, Antipolo City habang arestado naman ang suspek na si alyas 'Jes,' laborer at kapitbahay ng biktima.
Batay sa ulat ng Antipolo City Police, nabatid na dakong alas-6:30 ng gabi nang maganap ang krimen sa tahanan ng biktima.
Lumilitaw sa imbestigasyon ng pulisya na magkapitbahay ang biktima at suspek na dati nang nagkaroon ng mainitang pagtatalo dahil sa ilegal na koneksiyon ng kuryente.
Manugang na sinilaban ng buhay ang biyenan, patay na rin matapos lunukin handle ng toilet brush
Bago ang pananaksak, nagtungo umano ang suspek, na nasa ilalim ng impluwensiya ng alak, sa bahay ng biktima at nanggulo doon.
Sinipa pa umano ng suspek ang pinto ng bahay ng biktima at pinagmumura ito.
Tinangka umanong awatin ng mga kapitbahay at kaanak ng biktima ang suspek ngunit bigla na lang umano nitong sinugod ang biktima at sinaksak sa dibdib, na agaran nitong ikinamatay.
Naaresto naman ang suspek at itinurnover sa pulisya para sa kaukulang pagsasampa ng kaso.
Narekober rin ng mga awtoridad ang patalim na hinihinalang ginamit ng suspek sa pagpatay.
