Ibinahagi ng aktor na si Baron Geisler ang tungkol sa proyektong bubuuin niya kung saan gagampanan niya ang karakter ng pintor na si Juan Luna.
Sa ulat ng Philippine Entertainment Portal (PEP) noong Sabado, Agosto 3, sinabi ni Baron na pinapasulat umano ng manager niyang si Arnold Vegafria ang kuwento ni Juan Luna kay Roy Iglesias.
“Pinapasulat niya ‘yong Juan Luna kay Sir Roy Iglesias. Nag-usap na kami sa phone. So inaasikaso na rin iyan ni Boss Arnold. Isa siya sa mga producer,” kuwento ni Baron.
Gayunman, sinabi agad ni Baron na hindi raw nila masyadong bibigyang-tuon ang tungkol sa pagpaslang ni Luna sa asawa nito at biyenan.
Joshua Garcia, boboses sa Pinoy-dubbed version ng 'Inside Out 2'
“We’re not showcasing that part. Of course, may quirks but we’ll showcase his brilliance. How he started, how he became the first ilustrado,” aniya.
Bukod dito, nagpahayag din ang aktor na excitement sa upcoming project dahil bagama’t ilang beses na rin siyang napapabilang sa mga historical films, ito umano ang kauna-unahang beses na bibida siya.
“Lagi akong Español dati. Like sa El Presidente (2012), saka sa Baler (2008). I’m praying na matuloy,” pahabol pa ni Baron.
