Ipinahayag ni Senador Risa Hontiveros na maituturing na tagumpay para sa kalayaan sa pamamahayag ang naging pagpapawalang-sala kay Nobel Peace Prize laureate at Rappler chief executive officer Maria Ressa, maging sa Rappler Holdings Corporation (RHC) hinggil sa huli nilang tax evasion charge nitong Martes, Setyembre 12.

“The victory of Rappler CEO Maria Ressa and Rappler Holdings Corp. in the last in a series of trumped up tax evasion charges is a great triumph for press freedom in the Philippines.

I hope for the dismissal of other charges against Maria Ressa and other journalists at the receiving end of sham libel cases,” pahayag ni Hontiveros.

“Truth-tellers are often attacked and persecuted by those who weaponize the law to trample on their fundamental freedoms,” dagdag pa niya.

Maria Ressa, pinawalang-sala sa tax evasion

Sinabi rin ni Hontiveros na ang pag-atake sa mga mamamahayag ang dahilan kaya inihain niya ang Senate Bill No. 1593 na naglalayong i-decriminalize ang libel na karaniwang ginagamit upang mabusalan umano ang miyembro sa pahayagan.

Sa inilabas na desisyon ng Pasig RTC Branch 157, hinatulan si Ressa at ang Rappler na “not guilty” sa huli nilang tax evasion case na may kinalaman sa value-added tax return ng kompanya sa ikalawang quarter ng 2015 na nagkakahalaga ng humigit-kumulang ₱300,000.

Kaugnay nito, ayon sa senadora, ang mga kaso laban kina Maria Ressa at Rappler ay bunsod umano ng “legal harassment” ng administrasyon ni dating Pangulong Rodrigo Duterte dahil sa kanilang walang takot na pag-uulat ng mga isyu tulad ng “brutal” at “nabigong” giyera kontra iligal na droga sa bansa.

“The government must stop wasting taxpayer money and resources running after independent and critical journalists for doing their jobs and instead make the country safer for them. It is unacceptable in a democracy for more journalists like Percy Lapid to be harassed, attacked or worse, killed,” ani Hontiveros.