Hindi naitago ng isang pasahero ang pagkadismaya matapos ma-off-load umano sa dapat na flight kamakailan dahil sa aniya'y mabagal na proseso sa paliparan at sa kawalan ng koordinasyon ng mga awtoridad dito.

Ito ang viral nang pagbabahagi ng isang Jeru Pakingan Cajapin sa Facebook matapos bigong makasakay sa dapat na flight pa-Palau noong Pebrero 24.

Kuwento niya, ika-7:15 ng gabi nang makarating siya sa NAIA Terminal 3 at kalauna’y makapag-check-in sa loob lang ng labinlimang minuto.

Sey ng NBI: 'Fugitive Senator Dela Rosa will be arrested whether he likes it or not'

Matapos ang mabilisang dinner, pumila na aniya siya sa Bureau of Immigration (BI) Philippine Paassport Holder na batay sa kaniyang salaysay ay tatlong counter lang ang nag-aakomoda para sa nasa higit isandaang pasahero.

“I decided to talk to one of the BOI officers if they can assist us because our flight is at 10:40 pm. The officer told me to go back to our line and wait for the airline crew to assist us,” ani Jeru pagtuntong ng ika-9:10 ng gabi.

Matapos ang kalahating oras, nanatili pa rin aniya ang pasahero sa BOI Line. Maging ang sinasakyang United Airlines ay wala rin umanong naging abiso man lang sa kanilang mga pasahero.

Bandang 10:15 pm na nang may isang staff ng airline ang sa wakas ay nag-assist sa pasahero. Sa mga oras na ito, boarding na umano ang nakatalagang gate para sa kaniyang flight.

“With the assistance of Jaz, my friend Fabi pass through first from the BOI, after that it was Tony and then Chevy,” kuwento ni Jeru.

Sa kasamaang palad, 10:40 pm na nang makalagpas sa BOI ang pasahero dahilan para ay hindi na siya umabot sa boarding time.

“I think that there should be coordination between the ground crew and those who are the gate that some passengers are stuck at the airport. 4 of us were offloaded,” saloobin ni Jeru sa naging karanasan.

“They keep on blaming each other, the BOI and the airline. There were no proper coordination between the 2 on how they can solve this kind of problem,” dagdag niya na ang tanging pagpipiliang remedyo lang ng mga ito ay rebooking.

Dismayado rin na ibinahagi ng pasahero ang suhestiyon ng isa umanong BOI officer na nagsabing limang oras na palugit ang dapat na bunuin ng mga pasahero para siguradong umabot sa flight dahil abala na umano muli ang mga paliparan.

“We never heard our names announced in the P. A [public address] system. The only time that the staff of United Airlines assisted us was when I approached them. We didn't expect this kind of service from United Airlines. They are so reactive,” anang pasahero.

“NOW I UNDERSTAND MORE WHY NAIA IS CONSIDERED AS ONE OF THE WORST AIRPORTS IN THE WORLD,” pagtatapos niya.

Umabot na sa mahigit 16,000 reactions at mahigit 9,000 shares ang naturang post na kasalukuyang umaani rin ng samu’t saring reaksyon mula sa netizens.

Para sa maraming netizens, dapat umanong paghusayan pa ng NAIA ang serbisyo nito habang may ilan namang iginiit na kasalanan ng pasahero ang ma-off-load dahil umano'y late ito.

Wala pang pahayag o reaksyon ang BI sa viral na insidente.