Isa sa mga napag-usapan nina Cristy Fermin, Romel Chika, at Morly Alinio sa entertainment vlog na "Showbiz Now Na" ang kumpirmado umanong pagdadalantao ng sexy actress na si AJ Raval.
"Totoo po, mga kachika, nagdadalantao po si AJ Raval," panimula pa lamang ng kanilang vlog.
"Hindi po kasi makapagsisinungaling ang mga taong malapit sa kanila, na aming source tungkol sa isyung ito," giit pa ng showbiz columnist.
Matatandaang pinabulaanan na ni AJ ang mga intrigang buntis siya, sa pamamagitan ng pagpo-post ng kaniyang mga litrato, na nagpapakitang flat ang tiyan niya.
#BALITAnaw: Social media influencers na naging pasabog ngayong 2024
Subalit hindi naman ito bumenta sa ilang mga netizen. Anila, dati pa raw itong mga kuha.
Pumalag naman dito ang talent manager ni AJ at sinabing paanong magiging buntis si AJ gayong gumagawa ito ng isang action movie katambal si Kiko Estrada, para sa Vivamax.
Ayon kay Cristy, hindi mamatay-matay ang isyu ng pagbubuntis ng aktres. Nanghihinayang naman siya sa gumagandang career ni AJ.
"Kaya yung pelikula niyang sinimulan, hindi na itinuloy. Naaano lang ba ako, sayang 'tong batang ito," aniya.
Naniniwala naman siya na paninindigan naman ng rumored boyfriend niyang si Aljur Abrenica ang dinadala nito.
"Alam kong lalaking-alaki si Aljur. Kaya niya 'yan, pananagutan niya ang kanilang produkto ni AJ," aniya.
Kinakabahan daw si Cristy kapag may nanulsol sa estranged wife ni Aljur na si Kylie Padilla na magsampa ng kaso laban sa kanila, lalo't hindi pa naman gumugulong ang annulment nila.
Hamon naman ni Cristy, kung talagang hindi siya buntis, magpa-interview ito nang live.
"Makikita namin ang tiyan mo na flat," ani Cristy.
Sey naman ni Morly, sana raw personal na umamin si AJ.
Hirit naman ni Cristy, umamin na raw mismo si AJ sa kaniyang source.
Samantala, wala pang tugon, reaksiyon, o pahayag ang kampo nina AJ o Aljur tungkol sa isyung ito.
