Isa sa mga nagmartsa ngayong graduation season ang ex-Pinoy Big Brother housemate na si Neri Miranda, misis ng bokalista ng Parokya ni Edgar na si Chito Miranda.
Si Neri ay nagtapos kamakailan sa University of Baguio sa kursong Business Administration.
Sa isang mahabang Instagram post, pinasalamatan ni Neri ang kaniyang asawa sa walang sawa nitong suporta sa kaniyang mga pangarap sa buhay.
“Thankful ako sa asawa kong palaging andyan for me to support me. Masaya lang siya kahit nasa gilid lang at pinapalakpakan ako sa mga achievements ko. Mas magaan ang buhay kapag may nag eencourage sa'yo at naniniwala sa kakayanan mo. Thank you, asawa ko. Mahal na mahal kitaaa!❤” saad ni Neri.
Liza Soberano, nasiyahan sa 'Long Showers' nila ni Bright Vachirawit
Hinikayat naman ni Neri, mom of two, ang kaniyang mga followers na magtiwala lang sa kanilang sariling panahon habang nananatili pa ring abala sa ilang makabuluhang bagay.
“Sa lahat ng nakakabasa nito, kung kaya ko, mas kayo nyo. Kung wala pang budget, mag ipon ka lang. Iba iba man ang journey natin, yung iba mas mauuna, may male-late lang konti, meron matagal talagang dumating kagaya ng sa akin. Hindi naging madali sa akin lahat ha? Pero dahil palagi akong positibo na darating ang para sa akin, naghintay lang ako at habang naghihintay, ginagawa kong productive ang sarili ko. Para kapag ibinigay na ni Lord ang tamang panahon para sa akin, I AM READY.
“Kaya hahawaan ko kayo ng pagiging wais sa buhay, sa oras, sa pananaw sa buhay. Basta maging mabait lang sa lahat. Maging masaya sa success ng ibang tao at gawing inspirasyon to, maging fair sa lahat lalo na sa sarili mo, umiwas sa mga toxic na tao, manalig kay Lord, magtiwala sa sarili, at higit sa lahat... mag-share ng blessings,❤” dagdag na mensahe ni Neri para sa kaniyang followers.
Sinuklian naman ni Chito ng parehong pagkilala ang asawa sa panibagong milestone nito.
“Dati, may ngilan-ngilang natuwa at naaliw sayo dahil artista ka, at 6th placer ka sa PBB Star Circle Galaxy Quest, Dream Believe Repeat.
“Ngayon, nagsisilbi ka na bilang inspiration sa mga kababaihan...at hindi lamang sa mga kababaihan, kundi sa lahat ng nagnanais makamit, (at nag-aalinlangang i-pursue) yung mga dreams and goals nila sa buhay,” mababasa sa hiwalay na IG post ng supportive na mister.
Nagpaabot din ng pagbati sa bagong degree holder ang mga stars kabilang sina Pia Wurtzbach, Rico Blanco, Camille Prats, Mariel Padilla, Dingdong Dantes, Nadine Samonte, bukod sa iba pa.
