Para matulungan ang mga shoemaker at iba pang mga leather goods manufacturer sa Shoe Capital ng bansa sa panahon ng COVID-19 pandemic, nilagdaan ni Marikina City Mayor Marcelino “Marcy” Teodoro ang isang ordinansang nagbibigay ng tax relief sa lahat ng mga manggagawa sa lungsod.

Nangangahulugan ito na makakakuha sila ng discount mula sa buwis sa negosyo at mga bayarin sa permit sa loob ng limang taon.

Nabatid na nilagdaan ni Teodoro noong Martes ang Marikina City Ordinance No. 110 Series of 2021 o Ordinance Granting Business Tax Exemption and Relief to Local Footwear and Other Leather Goods Manufacturers ng Marikina sa Marikina Shoe Bazaar na matatagpuan sa Freedom Park, kanan, sa harap ng City Hall. 

Politics

Sen. Imee, ikinokonsidera daw maging Senate President?

Sa ilalim ng nabanggit na ordinansa, ang lahat ng mga tagagawa ng tsinelas at iba pang mga produktong gawa sa balat sa Marikina, na kasalukuyang gumagana o malapit nang magtatag ng negosyong paggawa ng mga sapatos, ay binibigyan ng exemption at relief sa buwis sa negosyo, tulad ng sumusunod:

 1. Para sa mga bagong negosyong bubuksan/papatakbo simula sa Taon ng Kalendaryo 2022; a. Sa pag-apply ng business license-free mula sa pagbabayad ng business tax; b. Sa ikalawang taon ng operasyon—75 porsiyentong diskwento sa buwis sa negosyo na dapat bayaran; c. Sa ikatlong taon ng operasyon--- 60 porsiyentong diskwento sa buwis sa negosyo na dapat bayaran ; d. Sa ikaapat na taon ng operasyon---- 50 porsiyentong diskwento sa buwis sa negosyo na dapat bayaran.

Samantala, ang mga negosyong kasalukuyang tumatakbo ay binibigyan ng 50 porsiyentong diskwento sa loob ng limang taon. 

Pinasalamatan naman ni Mayor Marcy ang Sangguniang Panlungsod ng Marikina sa pamumuno ni Vice Mayor Marion Andres sa mabilis na pagsasabuhay ng tax exemption at relief para sa mga shoemaker at iba pang mga tagagawa ng leather goods sa lungsod. 

“Originally, three years lang ang effectivity nito. Sa kabutihang loob ng City Council, for five years na ma-e-enjoy ‘yung diskwento dahil sa additional two years na binigay nila,” anang alkalde. 

“Two weeks ago, pinag-uusapan pa natin ito pero narito na ngayon salamat sa mabilis na pagkilos ng City Council. Malaking tulong ito sa mga magsasapatos at iba pang mga tagagawa ng leather goods na labis na naapektuhan ng pandemya,” dagdag ni Mayor Marcy. 

Para kay Marcy, mas mahalaga ang kabuhayan ng mga gumagawa ng sapatos kaysa sa pagkolekta ng buwis. 

Sa kanilang panig, nagpasalamat naman sina Tony Andres, chairman ng Marikina-based Philippine Footwear Federation Inc. (PFFI), at Corazon Espiritu, chairman ng Marikina bags and leather goods, kay Mayor Marcy at sa Sangguniang Panlungsod sa pagtulong sa muling pagtatayo ng Shoe Industry na lubhang naapektuhan ng pandemya. 

Mary Ann Santiago