Ipinagmalaki ni dating Vice President at ngayon ay Naga City Mayor Leni Robredo ang maraming nagawa ng administrasyon ni Pangulong Ferdinand "Bongbong" Marcos, Jr. pagdating sa mga lokal na pamahalaan, nang makapanayam siya tungkol sa inaaabangang ikalimang State of the Nation Address (SONA) ng Pangulo sa Lunes, Hulyo 27.
Sa ibinahagi ng isang Naga City-based journalist na si Bong Villacruz, sa video ng panayam kay Robredo na iniulat naman ng ABS-CBN News, inilahad niya kung ano-ano nga ba ang mga hinihintay niya at ng lahat sa iuulat ng Pangulo sa SONA.
Ang unang bahagi raw ng SONA ay ulat sa nagawa ng gobyerno sa nakalipas na tao. Ang susunod naman daw ay kung ano ang plano sa mga susunod pang taon, lalo't may nalalabi pang dalawang taon sa kaniyang administrasyon.
Sa puntong ito, sinabi ni Robredo na mahalagang maipabatid ni PBBM ang report kung ano ang mga nagawa ng pamahalaan sa nakalipas na taon.
"Kasi I think, marami rin yung hindi nakakaalam, yung maraming ginagawa ng pamahalaan," saad ng dating Pangalawang Pangulo.
Sen Alan, tinalakang 'ang ingay, dakdak nang dakdak' sa FB live niya
Ibinida ni Robredo ang nagawa ng pamahalaan sa Naga City na naging "recipient" ng napakaraming programa ng gobyerno, kagaya ng housing program, dahil na rin sa DHSUD o Department of Human Settlements and Urban Development.
"Malaki ang housing problem ng Naga kasi siyempre yung rapid urbanization dito, housing yung naiiwan, pero medyo nakakahabol tayo ngayon, dahil sa tulong ng DHSUD
Isa pa sa binanggit ni Robredo ang flood control kung saan ginawa raw pilot ang Naga City ng Department of Public Works and Highways (DPWH), para sa kanilang "Oplan Kontra-Baha" na marami raw ang naitulong sa lokal na pamahalaan, kagaya na lamang ng mga equipment at iba pang kinakailangang civil works, dahil sa mas pinalaking "LGSF" o local government support fund.
"Pero this year, yung mabuting ginawa ng pamahalaan, lahat meron, at transparent yung formulang ginamit," aniya pa.
"Halimbawa yung Naga, nakakuha kami ng ₱32 million na rice assistance, from LGSF, mabibigyan namin ng bigas yung lahat ng mahihirap dito. Pero lang kami yung nakakuha no'n, lahat ng LGUs meron," paliwanag pa niya.
"Iba-iba yung amount, kasi siyempre, depende sa population, depende sa laki ng lugar, pero klaro kasi, parang alam mo kung bakit eh," aniya pa.
Ibinida pa ni Robredo ang naibigay rin na pondo para naman sa mga scholar sa bawat barangay, bukod pa sa iba pang mga kailangan ng barangay hall kagaya ng pagpapa-install ng CCTV, sound system, at pagpapa-install ng ilan ng solar panels.
Hangad daw ng alkalde ng Naga City na magpatuloy pa ito sa mga susunod pang taon.
"So hindi 'yon ginagawa dati as fair, and as expanded as this one," giit pa ni Robredo.
"Sobrang laking bagay ang innovation na ito, to make LGSF more accessible to all the LGUs, kasi ang daming pangangailangan ng LGUs eh. And ito, ang laking tulong, so sana, ang wish naming mga mayors, sana next year lalo pa siyang ma-expand, at sana doon sa mga hirap na lugar," aniya pa.
Maki-Balita: Mayor Leni sa SONA ni PBBM: Maraming hindi nakakaalam sa maraming ginagawa ng pamahalaan!
