MALALIM man ang iniwang sugat ng pagkatalo sa puso ng mga nagmamahal sa southern division champion Davao Cocolife Tiger, itinuring ng pamunuan ng koponang pride ng Mindanao sa ayuda ng Cocolife na isang leksiyon ang kaganapan sa MPBL.
Mas lalong naging solido ang tambalang Davao Occidental LGU at pamunuan ng Cocolife upang isulong pa ang mas Mabangis na koponang Tigers na may misyong makaresbak at tuluyang makamit ang kampeonato sa Maharlika Pilipinas Basketball League sa susunod na edisyon ng ligang inorganisa ni Senator Manny Pacquiao.
Sa post-game interview kina Cocolife FVP Joseph Ronquillo at team owner Claudine Bautista ,tiniyak ng dalawang team top brass na lalo lang umigting ang kanilang hangaring maihandog ang karangalan sa kumpanya partikular sa Davaoeños
Isantabi na ayon kay Ronquillo ang kabiguang temporaryo lang at harapin ang bukas sa natutunang leksiyong di na dapat maulit ang mga pagkakamali at sobrang kumpiyansang gumiba sa pangarap kung kaya buong puwersa itong itatanghal tungo sa tagumpay na dapat ay tinatamasa na nila ngayon na napasakamay muna ng koponang mula Luzon.
