ANG ganda ng ngiti ni Jeric Gonzales nang pumirma ng recording contract sa GMA Records. Ramdam ng mga nakakita ang tuwa ng aktor dahil isa na naman sa kanyang mga pangarap ang natupad. Post nga ng aktor, “It’s just a dream. Until you do it.”
Hindi na lang sa Instagram (IG) maririnig ng fans ni Jeric ang mga cover ng mga paborito niyang kanta, dahil magkakaroon na siya ng solo song at sariling album.
Sa ngayon ay sa duet mula nila ni Kyline Alcantara ng Christmas song na Handa na ba Kayo muna maririnig na kumakanta si Jeric. Isusunod na niya rito ang solo song niya.
Samantala, patuloy na napapanood si Jeric sa Afternoon Prime ng GMA-7 na Ika-5 Utos bilang si Brix. Kinaaawaan ng viewers ang role nila ni Jean Garcia na gumaganap naman bilang kanyang ina, dahil puro na lang pang-aapi at pahirap ang kanilang dinaranas. Next year pa matatapos ang Ika-5 Utos, kaya matagal pa bago sumaya ang mag-ina.
