Ni AFP at REUTERS
Nagbabala ang United States at Australia laban sa militarisasyon sa South China Sea matapos maiulat na nagkabit ang China ng missile systems sa Spratlys sa unang pagkakataon.
Muling ipinagdiinan ng Beijing nitong Huwebes ang sinasabing karapatan nitong magtayo ng ‘’defence’’ facilities sa pinagtatalunang South China Sea, ngunit tumangging kumpirmahin ang mga ulat na nagkabit ito ng mga bagong missile sa mga artipisyal na isla na itinayo nito sa rehiyon.
Nagbabala ang Washington na haharapin ng Beijing ang ‘’consequences’’ sa militarisasyon nito sa South China Sea, at idiniin na binanggit na nito ang isyu sa China.
Sen. Risa, walang balak sumama sa 'Duterte bloc' sa Senado
Iniulat ng US network na CNBC nitong Miyerkules na nagkabit ang Chinese military ng anti-ship at air-to-air defences sa outposts na inaangkin din ng Vietnam at Pilipinas nitong mga nakalipas na 30 araw, binanggit ang sources mula sa US intelligence.
Sa regular briefing nitong Huwebes, nagpahaging si Chinese foreign ministry spokeswoman Hua Chunying nang hindi kinukumpirma o itinatanggi ang deployment.
‘’China’s peaceful construction in the Spratly archipelago, including the deployment of necessary national defence facilities, is aimed at protecting China’s sovereignty and security,’’ aniya.
‘’Those who don’t intend to violate (this sovereignty) have no reason to worry,’’ aniya.
Ang mga bagong Chinese missiles ay iniulat na ipinosisyon sa Fiery Cross Reef, Subi Reef at Mischief Reef, ayon sa CNBC.
Lahat ng mga islang ito ay bahagi ng kapuluan ng Spratlys na matatagpuan sa malayong katimugan ng mainland China, at napagitnaan naman ng Vietnam at Pilipinas.
Kahit na walang inaangking teritoryo ang Washington sa rehiyon, pinapanindigan nito ang freedom of navigation at nababahala sa militarisasyon ng Beijing sa South China Sea.
‘’We’re well aware of China’s militarisation of the South China Sea,’’ sinabi ni White House press secretary Sarah Sanders nitong Huwebes. ‘’We’ve raised concerns directly with the Chinese about this and there will be near-term and long-term consequences.’’
Sinabi ni Australian Foreign Minister Julie Bishop na hindi pa nakukumpirma ng Australian Government ang ulat, ngunit nakababahala ito.
“If the media reports are accurate then the Australian Government would be concerned because this would be contrary to China’s stated aspiration that it would not militarise these features,” ani Bishop.
“And any action to militarise features in the South China Sea would go against that responsibility and that role,” diin niya.
