Nagtamo ng mga saksak sa katawan ang isang lalaki dahil sa pagkabigong makapagbayad ng utang sa Sta. Cruz, Maynila, kamakalawa ng gabi.
Kasalukuyang ginagamot sa ospital si Daniel Algas, 34, ng 1339 Anacleto Street sa Sta. Cruz habang tinutugis naman ang suspek na si Angelo Gino Baez, ng 1345 Anacleto St., Sta. Cruz.
Sa ulat ni PO1 Neil Patrick Galiza, ng Manila Police District (MPD)-Station 3, kay Station Commander Police Supt. Santiago Pascual III, dakong 7:30 ng gabi nangyari ang insidente.
Una rito, nagkasalubong umano ang biktima at ang suspek at nagkaroon ng mainitang pagtatalo dahil sa P200 utang ng biktima sa suspek na hindi pa nababayaran.
143 Pinoy, pinagkalooban ng pardon ng UAE – PBBM
Nauwi sa suntukan ang pagtatalo ng dalawa hanggang sa bumunot ng patalim ang suspek at sinaksak ang biktima bago mabilis na tumakas.
Nagsasagawa na ng follow up operation ang mga awtoridad. (Mary Ann Santiago)
