Sen. Robin, pumalit kay Sen. Bato sa Blue Ribbon Committee!-Balita

Sen. Robin, pumalit kay Sen. Bato sa Blue Ribbon Committee!

Pormal na pinalitan ni Sen. Robin Padilla ang puwesto ni Sen. Ronald “Bato” Dela Rosa sa Senate Blue Ribbon Committee.

Ayon sa naging sesyon sa Senado ng mga senador noong Miyerkules, Pebrero 18, 2026, iminungkahi ni Senate Deputy Majority Leader JV Ejercito sa mataas na kapulungan si Padilla bilang kapalit ni Dela Rosa.

“For the committee on accountability of public officers and Investigation on the part of the minority, I move to elect Sen. Robinhood Padilla vice Sen. Ronald ‘Bato’ Dela Rosa,” ani Ejercito.

Hindi naman nakatanggap ng “objection” mula sa mga miyembro ng Senado ang naturang mosyon ni Ejercito at pormal itong inaprubahan ni Senate President Vicente “Tito” Sotto III.

Hindi na rin napag-usapan sa nasabing sesyon ang dahilan kung bakit pinalitan si Dela Rosa ni Padilla bilang miyembro ng nasabing Komite.

Samantala, wala pa namang inilalabas na tugon, reaksyon, o pahayag ang kampo ni Dela Rosa kaugnay sa pagkakapalit sa kaniya ni Padilla sa Senate Blue Ribbon Committee.

Matatandaang may naghihintay na arrest warrant diumano kay Dela Rosa sa International Criminal Court (ICC) dahil sa pagkakasangkot niya sa giyera kontra droga sa ilalim ni dating Pangulong Rodrigo Duterte.

Nobyembre 10, 2025, nang huling makita ang nasabing senador na dumalo sesyon ng Senado at mahigit tatlong buwan na itong hindi nakikita ng publiko.

Sa katunayan, nakabantay na umano ang Department of the Interior and Local Government (DILG) sa galaw ng senador ayon sa kalihim nitong si Jonvic Remulla.

KAUGNAY NA BALITA: Lokasyon, galaw ni Sen. Bato, minomonitor ng DILG

Bukod pa rito, isa rin si Dela Rosa sa inilabas na mga pangalan ng ICC bilang “co-perpetrator” umano ni FPRRD kasama ang kapuwa niya rin senador na si Sen. Bong Go at iba pang mga indibidwal.

KAUGNAY NA BALITA: Dela Rosa, Go, atbp., co-perpetrators sa war on drugs ni FPRRD—ICC

KAUGNAY NA BALITA: Lacson, nanindigang kailangang idaan sa lokal na korte sina Go, Dela Rosa

Mc Vincent Mirabuna/Balita

Rescue ops sa MBCA Amejara, itinigil na; 9 na katawan, hindi na nahanap

Opisyal nang inanunsyo ng Philippine Coast Guard District Southeastern Mindanao (CGDSEM) ang pagpapatigil ng “Search and Retrieval” operations para sa nawawalang motor banca na MBCA Amejara, noong Miyerkules, Pebrero 18. Ayon sa pahayag ng CGDSEM, matapos ang 15 araw nilang “Search and Rescue” operations at 15 araw pang extended na “Search and Retrieval” operations, isang pasahero...

Usec. Castro, kinudang ‘team itim power’ imbes na ‘girl power’ tambalang VP Sara–Sen. Imee

Tinawag na “team itim power” ni Palace Press Officer at Presidential Communications Office (PCO) Usec. Claire Castro ang lumutang na tambalan nina Vice President Sara Duterte at Sen. Imee Marcos para sa presidential election sa darating na 2028. Matatandaang inihayag ni Sen. Robin Padilla ang pagnanais niya sa tambalan nina VP Sara at Sen. Imee sa Halalan 2028, matapos na pormal na...

'Ang aga-aga!' PBBM admin, wala pang presidential bet sa 2028—Palasyo

Aminado ang Malacañang nitong Huwebes, Pebrero 19, 2026, na wala pang tinatalakay si Pangulong Ferdinand “Bongbong” Marcos Jr. hinggil sa magiging pambato nito sa pagkapangulo at posibleng mga koalisyon para sa halalan sa 2028.Ayon kay Palace Press Officer Undersecretary Claire Castro, hindi pa kasama sa prayoridad ng administrasyon ang usaping may kinalaman sa susunod na eleksyon.“Sa totoo...