Patuloy pa rin ang pag-iral ng Intertropical Convergence Zone (ITCZ) at easterlies sa bansa ngayong Huwebes, Mayo 15, ayon sa Philippine Atmospheric, Geophysical and Astronomical Services Administration (PAGASA).
Base sa ulat ng PAGASA dakong 4:00 ng madaling araw, inaasahang magdadala ang ITCZ—na tumutukoy sa linya kung saan nagtatagpo ang hangin mula sa northern at southern hemispheres—ng maulap na kalangitan na may kasamang kalat-kalat na pag-ulan at thunderstorms sa Mindanao, Leyte, Southern Leyte, Eastern Samar, at Palawan.
Pinag-iingat ang mga residente sa mga nasabing lugar sa posibleng pagbaha o pagguho ng lupa tuwing magkakaroon ng malalakas na pag-ulan.
Bukod sa maalinsangang panahon ay inaasaahan namang magdadala ang easterlies, o ang mainit na hanging nagmumula sa karagatang Pasipiko, ng medyo maulap hanggang sa maulap na kalangitan na may kasamang isolated rainshowers o thunderstorms sa Metro Manila at mga natitirang bahagi ng bansa.
Posible rin ang pagbaha o kaya nama’y pagguho ng lupa sa naturang mga lugar tuwing magkakaroon ng malalakas na thunderstorms.
'Underage pa po ako!' Raoul Manuel, humirit sa 'R.M.' na posibleng tandem ni VP Sara sa 2028
Sa kasalukuyan ay wala namang binabantayan ang PAGASA na bagyo o low pressure area (LPA) sa loob o labas ng Philippine area of responsibility (PAR).
