Isiniwalat ni Kapamilya Primetime King Coco Martin ang lubhang paghanga niya sa Ultimate Heartthrob actor na si Piolo Pascual.
Sa latest episode ng “Toni Talks” nitong Linggo, Enero 11, hayagan daw niyang inamin kay Piolo na may mga CD raw siya nito.
Ayon sa aktor, “Sobrang idol ko pa naman si idol PJ [Piolo]. Alam mo ganito nga, lagi kaming magkasama ‘pag kami naga-ASAP … kami ang drinking buddy.”
“Alam mo, ‘di talaga ako nahihiya sa kaniya. Sabi ko, Alam mo, Kuya Peej, alam mo dati may mga CD mo pa ako. Siyempre hindi siya makapaniwala,” wika niya.
Barbie Forteza, magkakaroon ba ng pelikula; sinong leading man?
Dagdag pa ni Coco, “Nahihiya man ako pero gusto kong malaman niya na parang iniidolo kita.”
Samantala, sa unang bahagi ng panayam, ibinahagi ni Coco na isa raw sa mga nakapagtulak sa kaniya para mas piliin ang pag-arte kaysa pagtatrabaho sa ibang bansa ay nang sabihin daw sa kaniya ng film producer na si Ferdie Lapuz na posible raw siyang maging tulad din ni Piolo matapos manalo ng kaniyang pelikula sa isang film festival.
“Sabi niya [Ferdie], nanalo tayo. Malay mo maging Piolo Pascual ka. No joke talaga. ‘Yon ang sinabi sa akin. Siyempre ako naman, nakainom kayo ‘di ba, dahil bata pa rin ako, nag-uto-uto naman ako,” aniya.
Sa kasalukuyan—ayon kay Ultimate Multimedia Star Toni Gonzaga—isa na rin daw si Coco sa mga iniidolong aktor ng mga bata at bagong artista sa industriya.
