Inihayag ng Philippine Atmospheric, Geophysical and Astronomical Services Administration (PAGASA) ngayong Sabado, Hunyo 29, na ang easterlies, o ang mainit na hanging nagmumula sa karagatang Pasipiko, ang kasalukuyang nakaaapekto sa silangang bahagi ng bansa.

Sa tala ng PAGASA kaninang 4:00 ng madaling araw, malaki ang tsansang magdudulot ang easterlies ng maulap na kalangitan na may mataas na tsansa ng mga kalat-kalat na pag-ulan at thunderstorms sa Caraga, Davao Region, at SOCCSKSARGEN.

Pinag-iingat ang mga residente sa mga nasabing lugar sa posibleng pagbaha o kaya nama’y pagguho ng lupa tuwing magkakaroon ng malalakas na pag-ulan.

Bukod dito ay mataas din ang tsansang magdala ang easterlies ng medyo maulap hanggang sa maulap na kalangitan na may kasamang mga pulo-pulong pag-ulan o thunderstorms sa Bicol Region, Eastern Visayas, Aurora, at Quezon.

Zamora sa 'perwisyo' ng Wattah Wattah Festival: 'Babawi tayo San Juan!'

Samantala, medyo maulap hanggang sa maulap na kalangitan na ma kasamang mga pulo-pulong pag-ulan o thunderstorms sa Metro Manila at mga natitirang bahagi ng bansa dahil naman sa localized thunderstorms.

Posible rin ang pagbaha o pagguho ng lupa tuwing magkakaroon ng malalakas na thunderstorms, ayon sa weather bureau.

Sa kasalukuyan ay wala namang binabantayan ang PAGASA na bagyo o low pressure area (LPA) sa loob man o labas ng Philippine area of responsibility (PAR).