Bumubuti na ang kondisyon nina Pangulong Ferdinand “Bongbong” Marcos Jr. at First Lady Liza Araneta-Marcos, bagama’t nakararanas pa rin sila ng “flu-like symptoms,” ayon sa Presidential Communications Office (PCO).
Sa isang pahayag nitong Huwebes, Marso 21, sinabi ng PCO na nagpapatuloy ang medikasyon at pagpapahinga ng First Couple para sa kanilang full recovery.
“The President and the First Lady continue to experience flu-like symptoms but with improvements, maintaining stable vital signs,” anang PCO.
“They are advised to continue medications, rest, and hydration for full recovery.”
PBBM at FL Liza, pinagpapahinga matapos magkaroon ng 'flu-like symptoms'
Samantala, patuloy naman daw na nagtatrabaho si PBBM sa kaniyang tirahan.
“The President continues to work in his residence, handling correspondence and directives within medical advice,” saad ng PCO.
“He anticipates resuming full public engagements soon, per his physician’s clearance,” dagdag pa nito.
Matatandaang nitong Miyerkules ng gabi, Marso 20, nang ianunsyo ng PCO na nagkaroon ng “flu-like symptoms” sina PBBM at FL Liza matapos ang kanilang “full schedule” noong mga nakaraang araw.
