Tila nagmukhang “sinaunang tao” ang netizen na si Chairein, 29, mula sa Baguio City dahil sa isang century-old camera na ginamit sa kaniyang photoshoot kamakailan.
“Photoshoot ba? Hahahah. So little get such an opportunity ,” caption ni Chairein sa kaniyang Facebook post na umani na ng mahigit 9,100 reactions, 456 comments, at 6,400 shares.
Sa eksklusibong panayam ng Balita, ibinahagi ni Chairein na agad siyang nagpunta sa isang cafe sa Baguio nang mabalitaan niyang magkakaroon ng photoshoot doon ang photographer na nagngangalang Clinton, na siyang nagpa-practice daw ng old-school craft.
“Ako kasi is a vintage, old or antique lover talaga. May mga collection din ako and I appreciate the old ways of doing things kasi it’s very purposeful and intentional which I think minsan sa panahon ngayon ay nawawala na,” kuwento ni Chairein sa Balita.
World Architecture Day: Ilang makasaysayang gusali sa bansa na nananatili pa ring nakatayo
Para ma-achieve naman ang gusto niyang concept sa photoshoot, talagang umuwi pa raw si Chairein para magpalit ng vintage clothes at accessories.
“Inisip ko rin pong isama ‘yung pusa kong si Princess Diana para mas demure and high class pa tingnan since dati usually ‘yung mga high end citizens ang may fancy pets,” ani Chairein.
“Actually medyo malayo siya kasi liblib ‘yung place. Nag-taxi kami papunta doon and naka-cat bag ‘yung pusa ko para comfortable siya. Saka ko na lang siya nilabas no’ng magpapa-picture na kami. Sobrang relaxed lang siya kaya nakakatuwa din,” dagdag niya.
Naramdaman naman daw ni Chairein ang “very humbling” experience sa naturang photoshoot dahil sa proseso raw nito na hindi nararanasan sa usual photoshoots sa panahon ngayon.
“Maa-apreciate mo ‘yung photo dahil sa complicated process niya. Sobrang educational din kasi. The work, the time and the intricacy put into one single photo na most likely, will be one of a kind. Hindi mo mare-reprint, hindi rin mauulit kasi kahit ulitin mo, there would be something different,” ani Chairein.
“I think well deserved na maraming maka-appreciate sa post. Not for me, but for Sir Clinton's efforts in reviving an antique camera and giving such an opportunity to the public. I am humbled to have been the muse to expose his crafts,” saad pa niya.
