Apat na pinaghihinalaang biktima ng human trafficking ang nasagip ng Philippine Coast Guard (PCG) habang sakay ng isang barko sa Port of Bongao, Tawi-Tawi kamakailan.
Sa ulat ng PCG, napansin ng mga miyembro ng CG Sea Marshal Unit-BARMM (Bangsamoro Autonomous Region in Muslim Mindanao) na naka-duty sa M/V Evergreen of Asia ang tatlong pasahero na pinaghihinalaang biktima ng human trafficking.
Kaagad na dinala ang tatlo sa Municipal Inter-Agency Committee Against Trafficking (MIACAT) upang isailalim sa imbestigasyon.
Bukod dito, isa ring 18-anyos babae na pinaghihinalaang biktima rin ng human trafficking ang nasa pangangalaga na ng MIACAT Tawi-Tawi at isinailalim na rin sa stress debriefing.
Ayon sa Coast Guard, patungo na sana sa Sabah, Malaysia ang nasabing pasahero upang maghanap ng trabaho nang masabat ng mga awtoridad.
Probinsya
