Hinikayat ni Pangulong Ferdinand Marcos, Jr. ang mga local government unit (LGU) na ituloy ang pagpapatayo ng isang milyong bahay kada taon hanggang 2028.
Ito ang binigyang-diin ni Marcos matapos inspeksyunin ang isang housing project sa San Fernando, Pampanga nitong Lunes.
Aniya, mapakikinabangan ng tinatayang aabot sa 8,300 pamilya ang nasabing pabahay.
Layunin ng panawagan ng Pangulo na matugunan ang housing backlog sa bansa.
"Hindi maaaring magawa itong mga ganitong klaseng malalaking proyekto kung hindi nagkakaisa at nagtutulungan ang local government at saka ang national government," anang punong ehekutibo.
Nakikipagtulungan aniya ang national government sa mga LGU upang matamo ang puntiryang pabahay ng pamahalaan.
Partikular na binisita ni Marcos ang Crystal Peak States project sa Pampanga na saklaw ng Pambansang Pabahay Para sa Pilipino Housing (4PH) Program ng gobyerno.
Betheena Unite
