Patay ang isang lalaki nang pagbabarilin umano ng 'di kilalang salarin habang nakikipag-inuman sa birthday party ng kanyang kaibigan sa Rodriguez, Rizal noong Miyerkules ng gabi.

Kaagad na binawian ng buhay ang biktimang si Rez Latoza Leonor, residente ng naturang lugar, dahil sa tinamong mga tama ng bala sa iba’t ibang bahagi ng katawan habangnakatakas naman ang 'di pa kilalang salarin matapos ang krimen, bitbit ang baril na ginamit sa pagpatay.

Batay sa ulat ng Rodriguez Municipal Police Station, nabatid na dakong alas-9:25 ng gabi nang maganap ang krimen sa Brgy. San Jose, sa Rodriguez.

Lumilitaw na dumalo si Leonor sa pagdiriwang ng kaarawan ng kanyang kaibigan ngunit nang nasa kalagitnaan na sila ng inuman ay bigla na lang umano itong pinagbabaril ng salarin.

Nang makitang napuruhan ang target ay mabilis na itong tumakas at pinaghahanap na ng mga otoridad sa ngayon.

Masusi pang iniimbestigahan ng mga pulis ang krimen.