Aminado ang susunod na “Darna” na si Jane De Leon na may pressure sa kaniya ngayong papalitan niya ang primetime slot ng patok na “FPJ's Ang Probinsiyano” ni Coco Martin.
Sa isang panayam matapos ang press conference ng brand new offering ng ABS-CBN nitong Lunes, sinagot ng young actress ang ilan pang miyembro ng press.
Pababahagi ni Jane, hindi madali ang naging paghahanda ng kanilang pagbuo ng teleserye sa gabay ng direktor na si Chito Rono.
“Actually halos ‘di naman ako napagalitan ni Direk Chito, basta ‘yun nga po, focus na lang, alert na lang. Ayaw niya lang talaga ang tatanga-tanga,” walang kiyemeng sabi ng katres.
Negosyo, nalugi! Ken Chan, 'di raw tinatakbuhan isinampang kaso sa kaniya
Aminado naman si Jane na kabado siya ngayong papalitan niya ang halos pitong taong pag-ere ng “FPJ's Ang Probinsiyano.”
“Nakaka-pressure naman po kasi kahit sinong mga artista na nagkakaroon ng show gusto mapalitan ‘yung slot at hindi ko naman in-expect na ako po ang papalit dun. Hindi ko alam ang reaksyon ngayon ni Coco but I’m so grateful and happy,” ani Jane at nangakong ibubuhos ang kaniyang best sa proyekto.
Natanong din ang aktres sa naging relasyon nila ni Joshua Garcia habang binubuo ang "Darna."
“Actually noong una, awkward kami, nangangapa kami sa isa’t isa pero slowly naman wino-workout naming yung friendship naming at ang maganda rito ay naging comfortable na kami sa isa’t isa,” aniya.
Matapos mapili bilang Darna noong 2019 na orihinal sanang gagawing pelikula, hindi rin itinago ng baguhang aktres na apektado siya sa mga natamong bashing sa social media.
“Sobrang apektado rin talaga ako. Yung nag-uumpisa [ako] sa Darna, hindi ko alam paano iha-handle kasi syempre from baguhang artista, sino ba ako, may mga questions din ako sa sarili ko. But slowly with my family and friends, sinusuportahan nila ako at [habang] may iisang taong nagtitiwala sa akin, pinupush ko ang sarili [ko],” ani Jane.
Curious na tanong din ng press, sino nga ba ang nasa likod ng bagong sigaw ni Darna?
“Ako yung sumigaw nun. Boses ko yun,” proud at nakangiting saad ni Jane.
Ang “Darna” ang pinakamalaking role na gagampanan ni Jane.
Sa darating na Agosto 15, mapapanuod na sa Kapamilya channels, A2Z, TV5 at iba pang online streaming platforms ang brand new Kapamilya program.
Samantala, determinado ang young actress na mas kumayod pa sa pagbulusok ng kaniyang showbiz career para sa pangarap niyang sariling bahay para sa ina.
