Ibinahagi ni Jake Ejercito ang larawan ng reunion niya sa Robredo sisters sa naganap na thanksgiving event ng Leni-Kiko tandem sa Ateneo de Manila University, Biyernes.
“Salamat sa inspirasyon at sakripisyo, Aika, Tricia, and Jill,” mababasa sa Facebook post ni Jake.
Makikita sa larawan ang pagyakap ni Jake sa magkakapatid.
Matatandaan ang naging aktibong pakikiisa ni Jake sa kampanya ni Robredo kabilang ang inisyatibang house to house campaign o palengke run kasama ang magkapatid.
Sa isa ring Facebook live ni Vice President Leni Robredo, mapapansin ang tila malalim nang samahang nabuo ng magkakapatid sa aktor.
“Mahal ka ng mga anak ko,” sambit ng bise-presidente nang makitang nanunuod sa kanyang live si Jake.
Binati rin ni Robredo ang anak ni Jake na si Ellie.
Nauna nang pinasalamatan ng aktor sina Robredo at Sen. Kiko Pangilinan sa pagpukaw sa damdamin ng nakararami sa kabila ng tila hindi pumabor na resulta ng eleksyon sa pangunguna ni Bongbong Marcos Jr. sa counting of votes.
“The movement your candidacies sparked is indeed unlike any other our country has seen and that is already a victory in itself. Hindi man nakuha ang pinangarap na resulta, walang pagsisisi sa pakikipaglaban,” saad ni Jake.
“Marahil kinapos tayo o hindi pa talaga handa ang karamihan, pero nanalo pa rin tayo. Hindi sa balota, kung hindi sa natuklasan at nararamdaman nating pag-asa. Wag natin sayangin,” dagdag niya.
