Natagpuang patay ang isang ginang at dalawa nitong anak na paslit matapos matrap sa nasusunog nilang bahay sa Taguig City, nitong Sabado, Abril 2.
Sa loob ng comfort room o palikuran natagpuang magkakasama at wala nang buhay ang mag-iina na kinilalang sina Ivy Berde, 33; Chris Vynard, 4; at Chris Jhayvien, pawang residente ng Barangay Calzada, Tipas, Taguig City.
Nakaligtas naman ang bunsong anak ni Ivy na 4-buwang gulang na unang naipasa nito sa kamay ng kanyang lola bago nagmamadaling balikan ang dalawang nabanggit na anak subalit tuluyang hindi na nakalabas ng bahay.
Sa inisyal na ulat ni SFO1 Jerry Panganiban ng Taguig City Bureau of Fire Protection, dakong 9:49 ng umaga nitong Sabado nagsimula ang apoy sa bahay ni Obdulla Delos Santos na nasa Generao Street corner Sta. Barbara St., Purok 5, Barangay Calzada-Tipas, Taguig City.
Empleyadong lasing, patay matapos sapakin ng ginising na katrabaho
Mabilis na kumalat ang apoy at naabot ang 50 bahay na pawang gawa sa light materials.
Bandang 11:59 ng umaga nang ideklarang fire out ni SFInsp Demetrio Sablan ang sunog sa lugar.
Patuloy pang sinisiyasat ng awtoridad ang sanhi ng sunog sa lugar at tinatayang P350,000 halaga ng ari-arian ang natupok sa insidente.
Ang mga nasunugan ay nanunuluyan ngayon malapit sa paaralan kung saan inaayudahan sila ng barangay at ng Taguig City Government.
