Naniniwala ang Department of Health (DOH) na kailangan munang magkaroon ng pagbaba sa clustering ng mga kaso ng coronavirus disease 2019 (COVID-19) at mapaluwag pa ang mga pagamutan bago maisailalim ang National Capital Region (NCR) sa mas maluwag na modified general community quarantine (MGCQ).
Ito ang ipinahayag ni Health Undersecretary Maria Rosario Vergeire kasunod nang desisyon ni Pangulong Rodrigo Duterte nitong Lunes ng gabi na panatilihin pa sa general community quarantine (GCQ) ang rehiyon sa buong buwan ng Oktubre.
Sang-ayon naman ang DOH sa desisyon ng pangulo.
Binigyang-diin ni Vergeire na dapat na mapababa ang clustering ng sakit at higit pang ma-decongest ang mga pagamutan sa Metro Manila upang maging handa ang mga naturang pasilidad, sakaling magkaroon muli ng pagdami ng mga kaso ng sakit.
Mga nagpakalat ng fake news tungkol sa 'petisyon,' lagot sa Korte Suprema!
Ipinaliwanag pa niya na bagamat sa ngayon ay nakikitaan na nila ng downward trend ang naitatalang COVID-19 cases sa Metro Manila, at nagkakaroon na rin ng pagbabago sa health system capacity sa rehiyon, ay nakakapagtala pa rin sila ng clustering ng COVID-19.
Nitong Lunes, iniulat ng DOH na mayroon silang na-monitor na 2,075 clusters ng COVID-19 cases sa buong bansa.
Nabatid na ang 84% o 1,749 ng mga clusters ay matatagpuan sa mga komunidad, 105 sa mga healthcare facilities, 36 sa mga bilangguan, at 185 sa iba pang settings.
Ang mga rehiyon umano na may pinakamaraming bilang ng clustering ay ang NCR, Region 4A, Region 7, at Region 3.
“So that’s one. If we can reduce the number of this clustering of cases and we can see that there is a decreasing trend of clustering in these specific areas, then we can be able to say that we can maybe shift into MGCQ,” ani Vergeire, sa panayam sa telebisyon.
“Another one would be the health system capacity. Though we were able to decongest our hospitals, we were able to bring down our critical care utilization to just about less than 60 percent from a once 81 percent at danger zone,” aniya pa.
-MARY ANN SANTIAGO
