NAKASALUBONG namin ang dating manager ng grupong JBK na nagpasikat ng kantang Anestisya na si Chris Cahilig sa Robinsons’ Magnolia nitong Lunes nang gabi at nagka-kumustahan.
Binanggit namin kung bakit niya binitiwan ang pagma-manage ng JBK na ngayon ay sikat na at napangiti sa amin si Chris.
“Masaya ako for them kasi at least ‘yung pagod nila may napuntahan na, alam naman nila kung ano ang ginawa ko sa kania. Actually okay kami, friends’ kami, lagi silang nagte-text sa akin, nagpapasalamat at nagkukuwento kung anong bago sa kanila. Lagi nilang pinasasalamatan na part ako kung nasaan man sila ngayon,” masayang kuwento ng dating manager nina Joshua Bulot, Bryan Del Rosario, at Kim Lawrenz Ordonio o mas kilala bilang JBK.
Chloe San Jose, mas pinipiling maging 'authentic' na tao kaysa people-pleaser
Walang panghihinayang sa parte ni Chris dahil nabago na ang linya niya, “I’m into directing and producing ng movie kaya hindi ko na rin sila maasikaso if ever.”
Ipinagmamalaki ngayon ni Chris ang bago niyang pelikula na sina Coleen Garcia at Edgar Allan Guzman ang bida na may titulong Mia na nakatakdang mapanood sa Enero 15, 2020 mula sa direksyon ni Veronica ‘Ronnie’ Velasco at release ng Viva Films.
“You should watch the movie ang galing nina Coleen and EA (tawag kay Edgar Allan), bagay sila ang ganda ng chemistry.
“Sobrang nagpapasalamat ako sa kanila kasi napaka-professional nila especially Coleen na akala ko mahirap ka-work kasi siyempre ‘di ba, hindi pala, sobrang bait as in. Hindi lang siya talaga ma-chika, lagi lang siyang nagbabasa ng script,” kuwento ni Chris.
Nabanggit din ni Chris na saka na siya magpapa-presscon dahil pauunahin muna niya ang mga pelikulang ipalalabas sa 2019 Metro Manila Film Festival.
“Too early pa naman saka umaandar naman na ang promo ko sa social media at ang lakas, (sabay pakita sa amin na mayroon ng 4M views sa trailer). Tapos may 20 buses ako na nanandoon ang poster ng movie, so okay na muna ako ro’n. Malakas ang buses kasi ‘di ba sa EDSA ang daan so nakikita mo ang posters, aware ang tao sa movie,”
kuwento pa ni Chris.
Pinanood namin ang trailer ng Mia at oo nga may chemistry sina Coleen at EA at ang ganda-ganda ni Mrs. Crawford sa pelikula, para siyang si Dakota Johnson o Anastasia Steele ng 50 Shades of Grey. Hmm, ito ba ng naging peg ng aktres?
Anyway, na-enjoy ni Chris ang pagpo-produce kaya dito siya concentrated ngayon bukod sa pagdi-direk ng short films.
-Reggee Bonoan
