NAGISING sa huling yugto ang defending champion Saint Clare College of Caloocan upang malampasan ang hamon ng Saint Francis of Assisi College, 68-65, at manatiling walang talo sa tampok na laro ng 19th National Athletic Association of Schools, Colleges and Universities (NAASCU) sa Marikina Sports Center Martes ng hapon.
Ang Saints ay nag-iisa ngayon sa tuktok ng Group na may kartadang 3-0 habang 2-1 na ang mga Doves.
Patuloy pa rin ang pag-asam ng Saints ng kanilang ika-apat na kampeonato sa NAASCU ngayong taon at ika-lima sa kasaysayan ng kolehiyo buhat pa noong 2012. Kasalukuyang may 26 sunod-sunod na panalo ang koponan at huling nakatikim ng talo sa pambungad na laban ng 17th NAASCU kontra sa Philippine Christian University, 88- 89, noong Agosto 17, 2017.
Sa ibang mga laro, humabol ang Our Lady of Fatima University upang ibigay sa AMA University ang kanilang ikatlong sunod na talo, 71- 56. Umarangkada agad ang Titans, 20-6, matapos ang unang quarter subalit hindi sumuko ang Phoenix upang makuha ang kanilang ikatlong tagumpay sa apat na laro sa Group A.
'Pikon daw?' UAAP fan na nag-dirty finger, agaw-eksena sa San Juan Arena!
Iniangat ng De La Salle Araneta University ang kanilang laro sa huling tatlong minuto para mapigil ang Holy Angel University, 74-58. Ito ang unang panalo ng Stallions habang 0-2 na ang Guardians sa Grupo B.
Umakyat ang Manuel L. Quezon University sa kartadang 2-2 sa Grupo A matapos durugin ang City University of Pasay, 73-62. Bumagsak ang Eagles sa 0-4 at nasa peligro na hindi makapasok sa playoffs na may dalawa pang nakatakdang laro sa Saint Clare at AMA.
