Sa panahon ngayon kung kailan mas lumalawak ang pag-unawa ng lipunan sa iba’t ibang identidad at oryentasyong sekswal, mas marami na ring tao ang nagiging bukas sa pagtalakay tungkol sa pagiging pansexual.
Tuwing Mayo 24, ipinagdiriwang sa iba’t ibang bahagi ng mundo ang Pansexual Awareness Day, isang araw na naglalayong magbigay-kaalaman at magpalawak ng kamalayan tungkol sa komunidad ng mga pansexual at panromantic, na isa sa mga umbrella ng LGBTQIA+ community.
Ayon sa mga ulat, layunin ng pagdiriwang na kilalanin at bigyang-boses ang mga taong kabilang sa naturang komunidad.
Ano nga ba ang pansexuality?
Batay sa ulat, ang pagiging pansexual ay tumutukoy sa pagkakaroon ng romantiko, emosyonal, o pisikal na atraksyon sa isang tao anuman ang kasarian o gender identity nito. Sa madaling salita, hindi kasarian ang pangunahing basehan ng pagkagusto o pagmamahal ng isang pansexual na indibidwal.
Ang mga makasaysayang karakter sa Santacruzan
Mula ito sa salitang Griyego na “pan,” na nangangahulugang “lahat.” Gayunman, nililinaw ng mga organisasyong nagsusulong ng LGBTQIA+ awareness na hindi ibig sabihin nito ay naaakit ang isang tao sa lahat ng tao. Sa halip, mas nakatuon ito sa koneksiyon, personalidad, at damdamin kaysa sa kasarian lamang.
Ayon sa mga pag-aaral at survey na binanggit ng Human Rights Campaign at GLAAD, dumarami ang kabataang kumikilala sa kanilang sarili bilang pansexual sa mga nakaraang taon. Isa ito sa mga indikasyon na mas nagiging bukas ang bagong henerasyon sa iba’t ibang uri ng identidad at ekspresyon ng sarili.
Para sa marami, ang pagiging pansexual ay hindi lamang tungkol sa label kundi tungkol sa kalayaang magmahal nang walang limitasyon ng tradisyonal na pananaw sa kasarian.
Sa kabila ng pag-usbong ng kamalayan tungkol dito, marami pa ring maling akala hinggil sa pagiging pansexual. May ilan na iniisip na ito ay “phase” lamang o kaya naman ay maling inuugnay sa pagiging “malandi” o “confused.”
Ngunit ayon sa ulat ng Good Morning America, kinikilala ng iba’t ibang LGBTQIA+ organizations ang pansexuality bilang lehitimong sexual orientation. Binibigyang-diin din ng mga eksperto na mahalagang respetuhin kung paano ipinapakilala ng isang tao ang kaniyang sarili.
Para sa mga miyembro ng LGBTQIA+ community, mahalaga ang mga awareness day tulad nito dahil nagsisilbi itong paalala na may mga taong patuloy na naghahangad ng pagtanggap, respeto, at ligtas na espasyo sa lipunan.
Sa huli, ipinapaalala ng Pansexual Awareness Day na ang pag-ibig ay maaaring lumampas sa mga nakagisnang kahon ng kasarian—at na ang bawat tao ay may karapatang mahalin at tanggapin kung sino talaga sila.
