MASOLO ang liderato sa pamumuno sa Group A ang tatangkain ng Marinerong Pilipino sa pagsabak kontra sa baguhang Asia’s Lashes sa pagpapatuloy ng 2019 PBA D League Foundation Cup ngayon sa Ynares Sports Arena sa Pasig.

Sasalang ang Skippers sa ikalawang laro ganap na 3:30 ng hapon pagkatapos ng sagupaan ng Technological Institute of the Philippines at Alberei sa pambungad na laban ganap na 1:30 ng hapon.

Kasalo ng Marinero ang CEU Scorpions na kasalukuyang hawak ang parehas na markang 3-0.

Hindi naman nalalayo at nakabuntot lamang sa kanila ang makakatunggaling Asia’s Lashes na may 2-1 karta.

Goodbye PBA? John Amores, tinanggalan na ng professional license!

Huling tinalo ng Skippers ang AMA Online Education, 91-82, nitong Agosto 8, habang kababalik pa lamang sa winning track ng Asia’s Lashes matapos mabigo sa ikalawa nilang laro nang padapain ang Naitalk-Savio, 77-62, nitong Agosto 12.

Pinapaboran naman sa unang salpukan ang Engineers kontra sa makakatunggaling Alberei na hindi pa nagwawagi matapos ang unang tatlong laro.

Samantala sa huling laban magtutuos naman ang McDavid-La Salle Araneta at ang Hyperwash na parehas naghahangad na umangat mula sa buntot ng Group B standings.

-Marivic Awitan

Mga Laro Ngayon

(Ynares Sports Arena, Pasig)

1:30 n.h. -- TIP vs Alberei

3:30 n.h. -- Asia’s Lashes vs Marinerong Pilipino