GUEST nitong Huwebes sa Magandang Buhay ang Cinema One Original film festival Best Actress, ang baguhan at transgender na si Iyah Mina na nagbida sa Mamu, and A Mother Too.
Sa nasabing episode, ipinakita ang video clips kung saan ibinahagi ni Vice Ganda ang tuwa at pagmamalaki niya para kay Iyah Mina, matapos itong kilalanin bilang unang transgender woman na nanalo ng Best Actress award sa Philippine Cinema.
Kalakip din nito ang video message ni Vice, na nagkuwento tungkol sa pagkakaibigan nila ni Iyah simula noong nag-uumpisa pa lang ang huli sa showbiz.
Negosyo, nalugi! Ken Chan, 'di raw tinatakbuhan isinampang kaso sa kaniya
“Sila ‘yung magkaka-batch nina Negi sa comedy bar. Nung nakita ko (sila), sabi ko, sila ‘yung new breed. Sila ‘yung mga ‘up and coming’, kaya ‘pag may mga ganap dito sa ABS-CBN, na naghahanap ng mga bagong komedyante, nire-refer ko sila nila Negi,” kuwento ni Vice.
Para sa It’s Showtime host, malaking bagay ang naging tagumpay ni Iyah.
“I’m very proud of her. Doon pa lang na nagkaroon siya ng pelikula na siya ang bida, masayang-masaya na ‘ko para sa kanya. ‘Yung nanalo siya ng Best Actress, bonus na lang ‘yun eh, pero ang laking bagay.”
Sinagot din ni Iyah ang mensahe ni Vice ng pasasalamat sa lahat ng naitulong nito sa kanyang career.
“Sobrang malaking bagay. Nagbibigay talaga siya (Vice) ng chance, nagbibigay siya ng moment. Kagabi nga, niyakap ko siya ulit, sabi ko sa kanya, ‘Thank you kasi hindi mo kami nakakalimutan, kaming mga baguhan’,” sabi ni Iyah.
-ADOR V. SALUTA
