Hindi ire-regulate ng Commission on Elections (Comelec) ang pangangampanya ng mga kandidato sa social media.

Ito ang nilinaw kahapon ni Comelec spokesman James Jimenez kasunod ng posibilidad na gumamit ng “campaign-related posts” ang mga kandidato sa 2019.

Hindi nila aniya maaaring isama o ibawas sa campaign ad limits ng mga kandidato ang posts nila sa social media.

Ipinaliwanag ni Jimenez na ang social media ay itinuturing na “personal expression” kaya’t protektado ito ng Konstitusyon.

National

UP, top university pa rin sa Pinas; Iba pang paaralan sa bansa, pasok sa Asian ranking!

“Hindi po kasama ang social media... Okay lang po ‘yon kasi nga ang social media talaga parang ano ‘yan eh, personal expression ‘yan eh. So protektado rin po iyan [ng Constitution]. As far as regulation code, mas maluwag po ang tingin natin sa social kaysa traditional media,” aniya.

Malaya rin ang mga netizen na ipangampanya ang kanilang mga napipisil na kandidato sa kani-kanilang social media accounts.

“Simpleng distribution lang ng pangkaraniwang tao, kunwari may nakita akong [campaign] poster... na gustung-gusto kong ikalat. So pinost ko sa account ko tapos shinare ng mga kaibigan ko. Hindi problema iyon [ng kandidato], walang implikasyon iyon sa kanyang regulations laban sa kaniya,” paliwanag pa ng poll official.

Gayunman, mahigpit naman aniya nilang imu-monitor ang mga tinatawag na “boosted” o”‘paid posts” dahil binabayaran ang mga ito.

“Pagdating sa social media, ang isang tinitingnan ng Comelec ay iyong mga boosted post na tinatawag – iyong mga nagbabayad ka ng mga P200 para dumami ang makakita ng mga post mo. Iyon ‘yung mga ganoong klaseng ad ang binabantayan natin,” dagdag ni Jimenez.

Tumatanggap hanggang Oktubre 17 ang Comelec ng Certificate of Candidacy (COC) kandidatura ng mga taong nais tumakbo sa Mayo 13.