Ni Bella Gamotea
Labis ang panlulumo ng isang marketing specialist makaraang biktimahin ng isang hindi pa nakikilalang lalaki na tumangay sa mahigit P160,000 halaga ng kanyang gadgets, cash at personal na gamit sa Muntinlupa City nitong Huwebes.
Kinilala ang biktima na si Ryel Christian Medina y Maloong, 22, binata, marketing specialist sa Pru Life UK sa Bonifacio Global City, at nakatira sa Mabuhay City, Barangay Mamatid, Cabuyao, Laguna.
Inilarawan naman ang suspek na nasa edad 20-25, katamtaman ang pangangatawan, may taas na 5’1”-5’4”, maputi, nakasuot ng bull cap, putting T-shirt, at maong pants.
4.5-magnitude na lindol, yumanig sa Surigao del Norte
Sa ulat na ipinarating sa Southern Police District (SPD), naganap ang panghoholdap sa Alabang Viaduct, tapat ng Metro Bank Labang Branch, Alabang, Muntinlupa City, dakong 4:30 ng madaling araw.
Sa inisyal na pagsisiyasat, pauwi na ang biktima at nag-aabang ng masasakyan sa lugar nang lapitan ng suspek at tinutukan ng patalim.
Ayon kay Medina, sinabihan siya ng suspek ng, “huwag kang maingay, papatayin kita! Ibigay mo cell phone at bag mo!”
Sa takot ng biktima, napilitan itong ibigay ang kanyang cell phone at bag na naglalaman ng dalawang iPhone 6, na nagkakahalaga ng P80,000; HP Elite Laptop-P80,000; Philippine Passport; iPhone charger; powerbank; earphones; laptop charger; BPI ATM card; BPI credit card; company ID; Mabuhay Miles; Get go card; DLSU identification card; wallet na may P4,000 cash; at Uniqlo shirt-P390.
Mabilis na tumakas ang suspek patungo sa direksiyon ng San Pedro Laguna.
Patuloy ang imbestigasyon at follow-up operation sa insidente.
