Ni: Clemen Bautista
TAPOS na ang 60 araw na pagpapairal ng martial law sa Mindanao nitong Hulyo 22. Ang martial law sa Mindanao ay idineklara ni Pangulong Rodrigo Duterte noong Mayo 23, 2017, nang pasukin ng Maute group ang Marawi City. Nagresulta sa araw-araw na matinding bakbakan sa pagitan ng mga kawal ng pamahalaan at ng Maute group at iba pang terorista.
Ito ay naging sanhi ng pagkamatay ng 500 katao na binubuo ng mga sundalo, sibilyan at miyembro ng Maute. Ang
matinding bakbakan ay nagbunga rin ng pagkawasak ng mga bahay at business establishment dahil sa walang-humpay na air strike ng mga eroplano ng pamahalaan. Nagsilikas din ang mga taga-Marawi City sa mga kalapit na siyudad.
Pagpapanatili ng mga Boses: Paano Pinoprotektahan ng NightOwlGPT ang mga Nanganganib na Wika
Habang patuloy ang bakbakan sa Marawi, bago sumapit ang Hulyo 22, hiniling ni Pangulong Duterte ang pagpapalawig ng martial law hanggang sa katapusan ng 2017. Nagdaos ng special joint session ang Senado at ang Kamara nitong Hulyo 22.
Ang joint session ay pinangunahan nina Senate President Aquilino Koko Pimentel at House Speaker Pantaleon Alvarez.
Matapos ang deliberasyon at talakayan ng mga pabor at kontra sa martial law, pinagtibay o pinayagan ang extension ng martial law na nais ni Pangulong Duterte.
Sa botohan sa Senado, 16 na senador ang pabor at 4 ang kontra na palawigin ang batas militar. Sa Kongreso, ang resulta ng botohan ay 245 ang pabor at 14 ang kontra. Sa magkasanib na botohan, 261 ang sumasang-ayon sa extension at 18 naman ang hindi. Sa talakayan, nagpahayag ng kani-kanilang pananaw ang mga sang-ayon at kontra. Bago nagbotohan sa Senado, hiniling ni Senate Minority Leader Franklin Drilon na susugan ang mosyon ni Senador Gringo Honasan na gawing 60 araw na lamang ang pagpapalawig sapagkat walang malinaw na batayan upang suportahan ang extension ng batas militar.
Nagpaliwanag din ang mga Kinatawan na kontra sa extension ng martial law. Ayon kay Representative Edcel Lagan, ang pamahalaan at ang mga opisyal ng militar na resource persons ay hindi nakapagbigay ng kapani-paniwalang pruweba na ang martial law ay kailangan sa Mindanao. Nanawagan naman ang mga Kinatawan ng Lanao del Sur na suportahan ang extension ng martial law upang masugpo na ang lahat ng mga pagbabanta sa kaligtasan. Isang... Kinatawan naman na Muslim ang nagsabing ang mga kontra sa pagpapalawig ng martial law ay pawang mula sa Luzon. Sana ay tumira umano sa Mindanao ang mga tumututol upang malaman nila ang kabutihang dulot ng martial law.
Sa pahayag naman ng tambolero ni Pangulong Duterte, natutuwa ang Palasyo na naunawaan ng 245 Kinatawan at 16 na Senador kung gaano kaseryoso ang banta ng terorismo sa Mindanao. Ayon pa kay Spokesperson Ernesto Abella, “The nation has chosen to stand united in defending the Republic. We thank congress for approving the extension of martial law until December 31, 2017.”
Sa pagpapalawig ng martial law sa Mindanao, matapos na sana ang giyera sa Marawi City, magkaroon ng katahimikan, tuluyang maibangon sa pagkakalugmok at makamit ang mailap na kapayapaan.
