MAPUPUNO ng pag-ibig at saya ang bawat umaga ng mga manonood dahil sa back-to-back na pasabog ng pinakabagong serye ng ABS-CBN na Ikaw Lang Ang Iibigin at ng It’s Showtime family sa PrimeTanghali simula bukas, Lunes (May 1).
Araw-araw nang makakasama ng mga manonood sa tanghalian ang pinakaaabangang balik-tambalan nina Kim Chiu at Gerald Anderson, kasama sina Jake Cuenca at Coleen Garcia. Makakatulong nila sa pagbibigay-saya ang kinagigiliwang It’s Showtime superstars na sina Anne Curtis, Vhong Navarro, at Vice Ganda.
Excited na ang Kimerald sa ibabahagi nilang kuwento ng pag-ibig at pamilya na sasalubong sa unang araw ng Mayo at magpapasabik sa mga manonood.
Netizen, ayaw na magbigay ng regalo sa pamilya niyang hindi marunong mag-appreciate
“Ang pagbabalik-tambalan namin ay naiiba ngayon. Gusto po naming magpasalamat in advance sa suportang ibibigay nila sa tanghali,” sabi ni Kim.
“Masaya po kami dahil magkakaroon kami ng platform para maipakita sa mga tao iyong produkto namin. Naniniwala kami rito at alam po namin na ibinigay po namin ang lahat sa proyektong ito para sa fans,” sabi naman ni Gerald.
Simula bukas, mapapanood na ang kuwento nina Bianca (Kim) at Gabriel (Gerald) na lalaban para sa pangarap at pag-ibig na magbibigay inspirasyon sa mga manonood.
Samantala, patuloy naman ang It’s Showtime sa pagdadala ng saya at katatawanan sa mga segment nitong “Twin It to Win It”, “Ginalingan Eh!,” at “Tawag ng Tanghalan Kids” na nagbibigay katuparan sa pangarap ng madlang pipol.
Panoorin ang sunshine na hatid sa tanghalian ng Ikaw Lang ang Iibigin at It’s Showtime sa PrimeTanghali ng ABS-CBN at sa ABS-CBN HD.
