MAGBABALIK telebisyon si Judy Ann Santos ngayong Mayo sa pinakabagong season ng Bet On Your Baby.

Excited nang magtrabaho ang Queen of Drama pagkaraang mapahinga ng mahigit isang taon para maging queen muna ng kanyang pamilya at isilang ang pangalawang supling nila ni Ryan Agoncillo.

“Napakasaya ko na gumawa uli ng isang show na malapit sa puso ko. Sana isa po sa inyong mga anak makasama namin sa Baby Dome. May mga bagong pasabog, pa-cute ng slight, na dapat abangan,” sabi ni Juday.

'Iconic women!' Pinakamalaki at pinakamaliit na babae sa buong mundo, nagkita!

Kabilang sa mga pasabog na ito ay ang pagkakaroon ni Juday ng bagong kasama -- ang digital mascot na si Piggy Bangs.

Bawat episode ay makakausap niya ito at makikigulo sa kanya at sa little prince at princesses na sasabak sa iba’t ibang games.

Bawat tsikiting na maglalaro ay magiging bahagi ng Baby Club at makaka-enjoy ng eksklusibong perks at access sa show.

Para sa pilot week, limang celebrity babies with their mommies and daddies ang maglalaban-laban. Magsisimula muna ang laro sa pagsabak nila paisa-isa sa Game Round na haharap ang kids sa iba’t ibang challenges sa loob ng Baby Dome.

Kinakailangang mahulaan ng parent kung hanggang saan magagawa ng kanyang chikiting ang challenge para magwagi ng P10,000. Makakakuha naman sila ng P5,000 consolation prize sakaling mali ang sagot nila.

Magkakaroon ng elimination sa second round na tatawaging “Watcha Makulit.” Ang unang family na makakakuha ng tamang sagot ang siyang aabante sa jackpot round. Dito may tatlong pagkakataon sina mommy, daddy, at baby na mahanap at mabasag ang piggy bank na naglalaman ng P1 million.

Nakikilala sa Bet on Your Baby ang mga cute at makukulit na baby ng bawat pamilyang kalahok, at napaghugutan din ng inspirasyon ng maraming Pilipino. Sa nakaraang dalawang season, 11 batang milyonaryo o tinawag na Babynaryos ang pinangalanan at nag-uwi ng jackpot. Dahil siksik sa mga bonggang premyo at nakakaantig na kuwento ng contestants, napamahal sa maraming pamilya ang Bet on Your Baby.