KAKAIBANG Valentine concert ang gaganapin sa PICC Plenary Hall sa February 14 dahil magsasama-sama ang anim na OPM hitmakers sa isang concert na pinamagatang LoveThrowback2.
Ang powerhouse line-up ng #LoveThrowback2 ay pangungunahan nina Ariel Rivera, Joey G., Jinky Vidal, Nina, Christian Bautista, at Hajji Alejandro. Aawitin nila ang ilan sa kanilang hit songs na naging bahagi ng buhay o buhay pag-ibig ng mga Pinoy.
Inaabangan din ang pagbabalik sa concert stage ng 90s singing heartthrob na si Ariel. Ang band royalties na sina Joey G. (former vocalist ng Side A) at Jinky Vidal (former female lead singer ng Freestyle) ay magsasama rin sa isang entablado para sariwain ang ilan sa mga pinasikat nilang awitin na kinagiliwan natin.
ALAMIN: Ano nga ba ang EBET Law na pinirmahan ni PBBM
Tiyak na kikiligin ang kababaihan kay Christian Bautista na kakantahin ang ilan sa hit songs niya na nagpasikat din sa kanya sa ibang bansa. Pahahangain at mapapa-emote rin ni Nina ang audience sa birit moments niya.
Muling iparirinig ni Hajji sa atin ang awiting nagpasikat sa kanya at naging dahilan kaya tinawag siyang Kilabot ng mga Kolehiyala.
Tiyak na malaking sing-along party ang #LoveThrowback2 na hindi dapat palampasin, mula sa production ng Royale Chimes Concerts and Events Inc. Available na ang tickets sa TicketWorld, TicketNet, o sa SM Tickets.
