Duguang bumulagta ang dalawang lalaki makaraang paulanan ng bala ng mga hindi pa nakikilalang suspek habang abala sa pagsusugal sa San Juan City, kahapon ng madaling araw.
Kinilala ang mga biktima na sina Aldrin Mina, nasa hustong gulang, ng 154 F. Blumentritt Street, San Perfecto; at Michael Galang, nasa hustong gulang, ng Barangay Little Baguio, kapwa sa San Juan City.
Sa pagsisiyasat ng San Juan City Police, dakong 1:00 ng madaling araw nang maganap ang pamamaril sa F. Blumentritt St.
Abala umano sa paglalaro ng cara y cruz ang mga biktima nang dumating ang dalawang suspek na kapwa nakasuot ng bonnet at magkaangkas sa motorsiklo at pinagbabaril ang mga una.
TINGNAN: Listahan ng mga kandidato sa pagka-senador at party-list
Nang makitang tumimbuwang ang mga biktima ay mabilis nang tumakas ang mga salarin habang isinugod sa San Juan Medical Center ang mga biktima ngunit huli na ang lahat.
Sa record ng pulisya, kapwa nasa drug watch list ang mga biktima kaya posible umanong may kinalaman sa ilegal na droga ang pamamaril. (Mary Ann Santiago)
