INABANGAN at pinanood ng buong cast ang pilot episode ng Langit Lupa kahapon habang sabay-sabay silang nagbi-
breakfast sa isang restaurant at naka-Facebook live sila, pero hindi namin nakita sa video si Direk Ruel S. Bayani.
Malaki ang tiwalang ibinigay ni Direk Ruel sa dalawang batang bida ng Langit Lupa na sina Yesha Camile at Xia Vigor na maituturing pang baguhan kumpara sa ibang Kapamilya young stars. Si Yesha, na nanalo sa Promil Pre-School iShine Talent Camp, ay pitong taong gulang at napasama na rin sa mga seryeng Hawak Kamay at Nathaniel.
Ang mayamang tradisyong tatak ng 'Paskong Pinoy'
Nanalo naman si Xia sa Mini Me contest ng It’s Showtime at nagkaroon ng papel sa FPJ’s Ang Probinsyano.
Kuwento ni Direk Ruel, magmamarka sa mga manonood sina Yesha at Xia sa papel nina Esang at Princess.
Natuwa kami habang pinagmamasdan ang dalawang bagets sa kanilang presscon dahil masyado silang prim and proper at nakikinig lang sa mga itinatanong at sagot ng mga kasama nila. Hindi sila adelantada, hindi katulad ng ibang batang artista na mahilig sumabad kahit hindi naman sila ang tinatanong.
At maayos silang sumagot, walang star complex, dahil nu’ng tanungin kung sino ang mas magaling, “Parehas po kami,” ang sabi ni Yesha. “Siya (si Xia) po ‘yung mas magaling. Kasi po, hindi pa po ako masyadong na-training,” dagdag pa niya.
“Siya (si Yesha) po ang mas magaling,” hirit naman ni Xia, “kasi marami na siyang naging teleserye at mas matagal po siyang artista kaya mas magaling po siya.”
O, di ba, nabibigayan ang dalawang bagets?
Parehong pitong taong gulang sina Yesha at Xia kaya apat na oras lang ang itinakda ng DOLE na working hours nila at sinusunod daw ito religiously ng RSB unit.
Kung gabi ang taping, bago mag-alas otso ay kailangan pack-up na sila at kino-call time sila sa hapon para saktong apat na oras lang talaga ang trabaho.
Sayang nga lang kasi sabi ni Direk Ruel, baka isang season lang ang Langit Lupa dahil limitado ang kuwento kapag bagets ang mga bida at hindi katulad ng ibang serye ng ABS-CBN kaya puwedeng mag-extend nang mag-extend.
Napaka-wholesome ng Langit Lupa at walang mabibigat na mga eksena sina Yesha at Xia dahil bawal ang may pisikalan.
Curious kami kung ano ang pilot rating ng Langit Lupa kahapon kumpara sa pinalitan nitong Be My Lady na nagwakas na last Friday. (REGGEE BONOAN)
