Target ang panalo, haharapin ng Phoenix ang Blackwater para pormal na makasiguro ng slot sa playoff sa OPPO-PBA Governors Cup ngayon sa Ynares Sports Center sa Antipolo City.
Taglay ang barahang 4-4, hawak ng Phoenix ang ikalimang puwesto sa likuran ng Meralco (5-5).
Liyamado ang Fuel Masters laban sa kulelat na Blackwater Elite sa kanilang laro ganap na 4:15 ng hapon.
“Slowly but surely, the team is maturing. Hopefully we’re peaking at the right time,” pahayag ni Phoenix coach Ariel Vanguardia matapos ang malaking 106-93 panalo kontra Star Hotshots nitong Biyernes.
Goodbye PBA? John Amores, tinanggalan na ng professional license!
Sisinghap-singhap ang kampanya ng Elite na kailangang mawalis ang nalalabing tatlong laro para makaangat sa playoff.
Magtutuos naman ang Alaska at Globalport sa main game sa 7:00 ng gabi.
Batay sa format ng season ending conference, ang top 8 teams matapos ang single round eliminations ang uusad sa quarterfinals.
Sa tampok na laro, maghihiwalay ng landas ang Aces at ang Globalport Batang Pier. Galing sa 120-122 kabiguan ang Globalport sa kamay ng Tropang Texters, habang nagwagi ang Aces sa huling laro kontra Elite. (Marivic Awitan)
