Mahigit tatlong buwan na ang lumipas simula nang nakawin ng mga hacker ang $81 million mula sa central bank ng Bangladesh at ipadala sa Pilipinas – ngunit tila malayo pa rin ang mga awtoridad sa pag-aresto sa mga nagtago sa karamihan ng mga pera sa pamamagitan ng isang bangko at ng mga casino sa Manila.
Wala pang naaaresto, at hindi pa rin pinahihintulutan ang National Bureau of Investigation (NBI) na lubusang makialam sa imbestigasyon, habang humuhupa na ang imbestigasyon ng Senado.
Nagpahayag ang ilang opisyal at private investigator na umaasa silang magkaroon ng progreso sa pagsunod sa money trail sa Pilipinas, ngunit sinabi nila sa Reuters na lumalamig na ito. Ayon sa kanila, maaaring kabisado ng mga salarin ang Pilipinas at posibleng pinili ito dahil sa kahinaan ng mga batas sa money laundering ng bansa.
Ang cyber-heist, isa sa pinakamalaki sa mundo, ay hindi dapat na itinuring na simpleng hacking ng isang bangko, ayon kay Augustus "Ace" Esmeralda, private investigator sa Manila.
Dating posisyon ni Pope Leo XIV, ipinasa kay Cardinal Tagle
"It's more of somebody stealing the money employing a hacker, and someone who knows banks, the anti-money laundering system, the casinos ... It's the modern-day Ocean's 11," aniya, na ang tinutukoy ay ang Hollywood movie tungkol sa isang crime syndicate na nagnanakaw sa mga casino sa Las Vegas.
"I call it Manila 12," dagdag ni Esmeralda, sinabing sinusundan niya ang kaso para sa dalawa niyang international bank client.
Isa sa pangunahing dahilan ay hindi sakop ng anti-money laundering law ng Pilipinas ang mga casino, nangangahulugan na hindi obligado ang mga ito na iulat ang mga kahina-hinalang transaksiyon o ang mga sangkot na player.
Humahadlang din sa mga imbestigador ang lumang bank secrecy laws na kabilang sa pinakamahigpit sa buong mundo.
Nakasaad dito na confidential ang halos lahat ng mga deposito at foreign currency details.
Pinasok ng mga hindi nakilalang hacker ang mga computer sa Bangladesh Bank noong Pebrero at nagtangka ng 35 money transfer, na nagkakahalaga ng kabuuang $951 million, mula sa account nito sa Federal Reserve Bank of New York.
Lahat maliban sa isa ay nailipat sa Rizal Commercial Banking Corp (RCBC) sa Pilipinas. Naharang ang karamihan, ngunit ang $81 million ay napunta sa mga account sa iisang sangay sa Manila. (Reuters)
