Patay ang isang mag-asawa makaraang manlaban sa pulisya habang isa ang nadakip sa buy-bust operation sa Koronadal City, South Cotabato, inihayag ng pulisya kahapon.
Ayon kay Police Supt. Barney Condes, hepe ng Koronadal City Police Office (KCPO), nangyari ang insidente dakong 4:20 ng hapon nitong Martes sa Park Ferry, Barangay Namnama, Koronadal City.
Tinamaan ng bala sa iba’t ibang parte ng katawan ang mag-asawang Jeffrey at Bailyn Dalamban, kapwa 30 anyos.
Hindi naman kinilala pulisya ang nadakip, na iniimbestigahan na sa kaso.
OFW na hinoldap, inundayan ng saksak sa terminal sa Maynila, nakauwi na ba sa pamilya?
Nauna rito, nasukol ng pulisya ang mag-asawa sa isang abandonadong kubo na ginawang safehouse ng mga ito, ngunit nanlaban ang dalawa nang aarestuhin.
Narekober mula sa mag-asawa ang dalawang .38 caliber revolver, shabu, at drug paraphernalia.
Nabatid sa pulisya na wanted ang grupo ni Jeffrey sa panghoholdap, carnapping, at pagbebenta ng ilegal na droga. (Fer Taboy)
