MAY bagong sitcom ang Kapamilya Network at mapapanood ito sa Cine Mo channel, ang Funny Ka, Pare Ko na pagbibidahan nina Bayani Agbayani at Karla Estrada.
Kahit na walang kontrata sa ABS-CBN si Bayani, dahil may problema pa siya sa ibang network, masaya ang komedyante na hindi siya pinababayaan ng ABS-CBN. Kaya todo-pasasalamat siya na lagi itong may nakalaang project para sa kanya.
“Wala akong kontrata. Ako kasi, utang na loob ko sa ABS-CBN, kaya hindi ako nag-iisip ng ano pa bang mangyayari sa career ko dahil ang ABS hindi nila pinababayaan ang artista nila. Ang ABS-CBN mismo ang nagpaplano kung paano mo tatahakin ang career mo. Bawat artista ‘yan. Kaya alam na alam ko na sila Ma’am Charo (Santos-Concio) at Ma’am Cory (Vidanes) na may plan sila para sa akin at ‘yun ang ‘pinapasalamat ko,” bungad ni Bayani nang humarap sa isang presscon.
ALAMIN: Mga dapat malaman at gawin upang maging ligtas sa ‘tsunami’
Kilala at nakatatak kay Bayani ang pagpapatawa kaya’t no major adjustments ang sitcoms para sa kanya.
“Actually hindi naman ako natigil, nasa ibang istasyon lang. Matagal akong hindi nagkaroon ng sariling show. Laging kasama ko si Aga (Muhlach) or si Cesar Montano. This time maraming-maraming salamat sa ABS-CBN, talagang kahit kelan hindi kayo nagsasawang maniwala sa amin na mga baguhang komedyante at lagi n’yo kaming sinusuportahan.
“Kung tinatanong n’yo kung naninibago ako, hindi naman masyado. Maging sa harap at likod ng camera gano’n kami. Gano’n naman actually ang technique ng pagpapaptawa, eh. Dapat dire-diretso ka lang na masaya, dire-diretso ka lang na nagpapasaya ng tao kahit walang umiikot na camera sa harap mo. Kasi ang unang-unang barometer ng pagpapatawa ‘yung pamilya mo, eh,” magandang pahayag ni Bayani.
Sa Funny Ka, Pare Ko, gagampanan niya ang role bilang asawa ni Karla Karla. Ginagawa nilang talent show sa gabi ang isang restaurant sa kapitbahay, ang ilan sa talents o performers niya ay discoveries mula sa finalist ng “Funny One” segment ng It’s Showtime gaya nina Ryan Rems, Crazy Duo at No Direction.
“Ako, ever since gumagawa ako ng proyekto hindi ko iniisip na ako ‘yung bida. Ang iniisip ko lang ay iyong proyektong ginagawa namin. Kaming lahat ang gumagawa nu’n, kaming lahat ang bida. Kasi ‘pag hindi in touch ‘yung sarili mo sa mga kasama mo, hindi kayo magkakaroon ng harmonious relationship. Dapat lahat kayo bida,” ani Bayani.
Wala siyang anumang problema sa pakikipagtrabaho kay Karla dahil umpisa pa lamang niya sa ABS, lagi na silang nagkikita ng tinatagurian ngayong ‘queen mother’.
“Nagkikita kami at may common friend kami na lagi namin ‘yung pinag-uusapan,” aniya pa. (ADOR SALUTA)
