Aabot sa humigit-kumulang 3,000 paniki ang nasaksihan ng Community Environment and Natural Resources Office (CENRO) Kiamba personnel sa Maitum, Sarangani noong Miyerkules, Abril 22.
Ayon sa ulat na ibinahagi ng Department of Environment and Natural Resources (DENR) Soccsksargen noon namang Huwebes, Abril 23, nakita ang mga paniki habang nagsasagawa ng isang monitoring activity ang CENRO kasama ang barangay local government unit (BLGU) ng Pinol at ang Municipal ENRO Maitum.
Paliwanag ng DENR Soccsksargen, tanda raw ito ng isang “healthy ecosystem” at “biodiversity” ng nabanggit na lugar.
“The recorded population reflects a healthy biodiversity status in the area. While some changes in roosting sites were noted due to natural environmental dynamics and shifts in available food sources, these observations also highlight the adaptability of the species and the ongoing resilience of the ecosystem,” saad ng DENR sa kanilang ulat.
Anila pa, mahalaga raw ang mga paniki sa pagpapanatili ng balanse sa ecosystem, dahil sa pakikibahagi ng mga ito sa iba’t ibang ecological processes gaya na lamang ng “pollination” at “seed dispersal.”
Giit naman ng CENRO Kiamba, patuloy ang kanilang pagkilos upang mapanatili nila ang kanilang suporta sa “wildlife protection” at “ecological integrity.”
