KAABANG-ABANG uli ang kuwentong ibabahagi ng Maalaala Mo Kaya ngayong gabi tungkol sa isang transgender at isang babae na naghati sa pagmamahal ng iisang lalaki.
Transgender woman si Sashi (Joross Gamboa) na nakipaghiwalay sa karelasyong lalaki nang ipagpalit siya nito sa isang babae. Kahit nasaktan, makikilala at mahuhulog ang loob niya kay Rex (Polo Ravales) na lingid sa kaalaman niya ay may karelasyon na, ang longtime girlfriend nitong si Fats (Roxanne Guinoo).
ALAMIN: Ano nga ba ang EBET Law na pinirmahan ni PBBM
Parehong ayaw sumuko nina Sashi at Fats sa pag-angkin kay Rex. Kaya mapipilitin ang dalawa na manatili sa relasyon at maging kahati ang isa’t isa, lalo na’t hindi rin makapili si Rex kung sino nga ba ang higit niyang mahal sa kanilang dalawa.
Paano pagsasaluhan nina Sashi at Fats ang pag-ibig ni Rex? Magkasundo pa kaya sila sa kabila ng kanilang kakaibang sitwasyon? Sino nga ba ang pipiliin ni Rex sa huli?
Makakasama nina Roxanne Guinoo, Joross Gamboa, Polo Ravales sa episode na ito sina Maritess Joaquin, IC Mendoza, at Lassy, mula sa script ni Benson Logronio at sa direksiyon ni Raz de la Torre. Ang MMK ay pinamumunuan ng business unit head na si Malou Santos.
