PARA sa AlDub Nation, ang masusugid na fans nina Alden Richards at Maine Mendoza, pinakamaganda at kilig to the max ang katatapos na 18th weeksary nina Alden at Maine na nagsimula sa pagsundo ni Alden kay Maine kung nasaang barangay sila nina Lola Nidora (Wally Bayola) at Lola Tidora (Paolo Ballesteros) para sa sugod-bahay ng Eat Bulaga. Hindi naman nahirapang magpaalam si Alden kay Nidora, na mai-date si Maine, kahit noong una ay parang alanganin ito.
“Doon lamang po kami sa Broadway studio, lola, doon sa una naming pagdi-date ni Yaya na hindi natapos,” wika ni Alden nang maibigay na ang pasalubong na bouquet of flowers, siomai at hopia sa dalawang lola. “Lahat po ng bilin ninyo, susundin ko at ibabalik agad dito si Yaya.”
“Sige, Alden, alagaan mong mabuti si Yaya,” sabi ni Nidora. “Pero ingatan mo siya at ikaw naman Yaya, ayaw kong makipag-away kay Cindy (Alina Bogdanova, the Russian model na gusto ni Lola Babah ni Alden) kapag bigla itong dumating sa studio.”
ALAMIN: Ano nga ba ang EBET Law na pinirmahan ni PBBM
Masayang-masaya sina Alden at Maine na nagmano kina Joey de Leon, Allan K at bumeso kay Julia Clarete, bago dinala ni Alden si Yaya sa inihanda niyang table sa backstage ng studio. Tumawag si Cindy pero sinabi ni Alden na wala siya sa studio, nasa bahay lamang siya at may sakit.
Siyempre, selos na naman si Yaya, pero nawala rin at masaya na silang kumain ng usual na paboritong pagkain na isaw, siomai at soup, subuan pa sila habang nagpapalitan ng jokes. Nagalit si Nidora, bakit daw pumunta pa sa studio kung magdyo-joke lang naman sila. Hayaan na lang daw, sabi ni Tidora.
Dahil 18th Weeksary, parang debutante si Maine na binigyan ni Alden ng 18 red roses habang nagwa-waltz sila sa tugtog ng God Gave Me You na una nilang sinayaw noong Tamang Panahon sa Philippine Arena. Sa pagtatapos ng sayaw, na umikot si Maine, muntik pa silang magkahalikan na ikinatili ng audience sa studio.
Nasira ang pag-uusap ng dalawa nang biglang dumating si Cindy na hinahanap si Alden. Pumasok pa siya sa studio at tinanong ang audience kung nasaan si Alden, pero natukoy din niya ang kinaroroonan ng dalawa. Itinago ni Yaya si Alden sa suot niyang cardigan, pero nang sabihin ni Cindy na magsusumbong siya kay Lola Babah, lumabas na rin siya.
Sinabi ni Cindy na halikan siya ni Alden kaya biglang niyakap ni Alden si Yaya, siya lamang daw ang babaeng gusto niyang halikan. Nagpaligsahan na naman sina Maine at Cindy ng modelling, pero dahil mataas si Cindy, kinarga siya ni Alden habang kausap nito ang Russian model. Biro tuloy ni Joey, para-paraan lang daw si Alden, na tinilian ng fans.
Ang problema, sabi ni Cindy engaged na sila ni Alden at dapat pakasalan na siya nito dahil ipinangako raw iyon sa kanya ni Lola Babah. Gusto ni Alden bawiin ni Cindy ang sinabi nito pero ayaw nito at ang sabi: “nakakaloka” sabay walkout. Siyempre pa natapos ang date na galit na naman si Yaya kay Alden.
After ng kalyeserye, since naroon na si Maine sa studio, naging co-host siya nina Alden at Sam YG sa “ATM with the BAEs” segment.
Pagkatapos ng Eat Bulaga, sabay nang in-interview ng BBC correspondent na si Rico Hizon, a Filipino journalist, sina Alden at Maine. Hintayin na lamang ng mga AlDub Nation kung kailan ito ipalalabas sa BBC na itinaon ng staff nila na nag-cover sa katatapos na APEC Summit, na ma-interview ang phenomenal love team. (NORA CALDERON)
