Inihayag ni US Vice President JD Vance nitong Linggo, Abril 12, 2026 na aalis na ang kaniyang negotiating team mula sa Pakistan matapos mabigong makamit ang kasunduan sa Iran, kasunod ng mahigit 21 oras na tuloy-tuloy na negosasyon.
Ayon kay Vance, nagkaroon ng kakulangan sa usapan at pinili umano ng Iran na hindi tanggapin ang mga kondisyon ng Estados Unidos, kabilang ang hindi pagbuo ng nuclear weapons.
“The bad news is that we have not reached an agreement, and I think that’s bad news for Iran much more than it’s bad news for the United States of America,” ani Vance sa pagharap niya sa media sa Pakistan.
Dagdag pa niya, “So we go back to the United States having not come to an agreement. We’ve made very clear what our red lines are.“
Sinabi rin ni Vance na ilang ulit niyang nakausap si US President Donald Trump sa panahon ng negosasyon.
WHO, nababahala sa ‘scale and speed’ ng Ebola outbreak; 134 suspected deaths naitala
Isinagawa ang usapan sa Islamabad, na itinuturing na kauna-unahang direktang pagpupulong ng US at Iran sa loob ng mahigit isang dekada at pinakamataas na antas ng talakayan mula noong 1979 Islamic Revolution.
Malaki ang inaasahang magiging epekto ng resulta nito sa umiiral na dalawang linggong ceasefire at sa muling pagbubukas ng Strait of Hormuz, na mahalagang daluyan ng humigit-kumulang 20% ng pandaigdigang suplay ng enerhiya.
Sa hiwalay na pahayag sa X, sinabi ng pamahalaan ng Iran na natapos na ang usapan at magpapalitan ng mga dokumento ang mga technical expert ng magkabilang panig. Dagdag pa nito, magpapatuloy ang negosasyon sa kabila ng ilang natitirang hindi pagkakaunawaan, bagaman hindi tinukoy kung kailan ito muling sisimulan.
Dumalo sa pagpupulong sina Vance, special envoy na si Steve Witkoff, at manugang ni Trump na si Jared Kushner, kasama ang Iranian parliamentary speaker na si Mohammad Baqer Qalibaf at foreign minister na si Abbas Araqchi.
Ayon sa mga source mula sa Pakistan, tumagal ng dalawang oras ang pulong bago nagkaroon ng pahinga, at nagkaroon ng pabago-bagong emosyon sa magkabilang panig habang isinasagawa ang unang round ng negosasyon.
Mahigpit na isinailalim sa seguridad ang Islamabad sa panahon ng usapan, kung saan libo-libong paramilitary personnel at sundalo ang idineploy. Ang papel ng Pakistan bilang tagapamagitan ay itinuturing na malaking pagbabago mula sa pagiging diplomatikong outcast nito noong nakaraang taon.
